И мукьвара Хив райондин Цналрин хуьряй тир тарихчи, РФ-дин писателрин союздин член Велибегов Рамазанан «ЧкIай хуьрерин тарих» нубатдин ктаб акъатна. Автор кIелзавайбуруз «Цналринни Цлахърин хуьрерин тарих», «Аламатдин къванер», «Гъалибвилин паркуна» ктабралди, газетрани журналра мукьвал-мукьвал чапзавай эсерралдини макъалайралди чида. Тарихчидин, писателдин вичин гъиляй кьабулай ктаб кIелай зун ихьтин фикиррал атана.
«ЧкIай хуьрерин тарих», кьил-кьилел алаз, дегь заманайрилай инихъ чи гила амачир хуьрерикай тамамарнавай важиблу ахтармишун я. Акьалтзавай несилдиз ахлакьдин дуьз тербия гун, ери-бинеяр, куьгьне хуьрер, ата-бубайрилай агакьнавай ирс, тарих ва культура чирун патал адахъ дерин метлеб ава. Ам кIелайла, гъавурда акьазвайвал, А. Рамазанова ктабдал еке зегьмет чIугунва, республикадин, райондин ва хизанрин архивра документар тупIалай авунва, талукь литература кIелнава, яшар хьанвай инсанрин рикIел хкунриз яб ганва. ЧIугур зегьметди хъсан нетижани гана. Чи гъилиз вичиз рикIивай итиж ийиз тазвай ктаб атанва.
Ругуд хуьруьн — Цналрин, ЗахитIрин, Фиригърин, Цлахърин, Курарин, Камар-хуьруьн алатай девиррикай, абурун къенин йикъакай, а хуьрерай тир тIвар-ван акъатай, уьлкве ва халкь патал зегьметар чIугур кьегьалрикай, делилрал бинелу яз, галай-галайвал суьгьбет авунва. И хуьрерай Ватандин ЧIехи дяведиз фейи, фронтда чанар гайи, гьакI элкъвена хкведай бахт хьайи кьве виш касдин тIварар, абурукай гзафбурун шикиларни кIелзавайбурал агакьарун Рамазан Велибегован гьунар я. За фикирзавайвал, гила амачир а куьгьне хуьрерай арандиз куьч хьанвай, ана авадан уьмуьр тухузвай, амма чпин бинеяр рикIел аламай гьар са хизанда и ктаб хьун лазим я.
Абдулашим Рамазанов, зегьметдин ветеран,
РФ-дин образованидин гьуьрметлу работник
