Алай вахтунда Вирироссиядин «Пешеда виридалайни хъсанди» конкурсдин Дагъустанда сад лагьай сефер яз кьиле тухузвай региондин паюна иштиракун патал арзаяр кьабулун давам жезва. И йикъара Махачкъалада, «Дагъустан» РИА-дин залда, конкурсдиз талукьарнавай пресс-конференциядал РД-дин зегьметдин ва яшайиш вилик тухунин министерстводин отделдин начальник Сайгид Мутаиломова ва консультант Жамиля Шаибовади къейд авурвал, кьилин фикир жегьил пешекарриз гуда. Санлай къачурла, конкурс пуд паюникай (модулрикай) ибарат я. Региондин пай 11-июлдилай 29-июлдалди давам жеда. Кьвед лагьай пай Самарада кьиле фида. Гъалибчийриз са миллион, 500 агъзур ва 300 агъзур манат гуда.
— Россиядин зегьметдин ва яшайиш вилик тухунин министерстводи тешкилзавай и конкурс уьлкведин регионра 2011-йисалай инихъ кьиле тухузва. Амма Дагъустанди, вучиз ятIани, ана иштиракзавачир. Региондин паюникай рахайтIа, конкурсдин иштиракчийрин арада гьам тежрибадай, гьамни теориядай чирвилерин акъажунар кьиле фида. Рабочий пешейрай, абурун кьадар саки 20-далай виниз яз, кьиле тухузвай конкурсдин макьсад и ва я маса рекьяй виридалайни хъсан пешекарар винел акъудун я. Гьа са вахтунда экспертрин комиссияди пешекарди вичин презентация кьиле тухузвай тегьердизни еке фикир гуда. Мисал яз, уьмуьрда са кьадар вахтунда кIвалахна, ахпа чпин пеше дегишарзавай ксар ава. Вучиз абур ихьтин къарардал атана? Вучиз и пеше хкягъун лазим я? Им лагьай чIал я хьи, инсанди вичин пешедикай фикир желбдайвал суьгьбет авунизни жюриди, экспертри къимет гуда. Уьлкведа санлай рабочий пешейрин кьитвал гьиссзавайла, конкурсдин тешкилатчийри ихьтин эвер гунрихъ важиблувал аваз гьисабзава, — къейдна С. Мутаиломова.
Жамиля Шаибовади алава хъувурвал, конкурсда иштиракун патал арза работодателдивай хьиз, ана иштиракиз кIанзавай пешекардивайни гуз жеда. Абурун яшариз фикир гузвач. Работодателдивай са шумуд пешекардин патахъай арза гуз жеда. Ана иштиракзавай ксари чпин пешедикай видеоролик гьазурун ва ам Россияда къадагъа алачир соцсетра эцигун лазим я. Гьа са вахтунда самозанятый ксаривай конкурсда иштиракиз жезвач. Карханада, гъвечIи ва чIехивилелай аслу тушиз, кIвалахдин рекьяй са йисалай тIимил тушиз тежриба хьунни кьилин шартIарикай я. Конкурсдин шартIарикай «Работа России» порталда гегьеншдаказ ганва.
Регина Семедова
