12-августдиз Махачкъалада, Дуствилин кIвале, алатай кIелунин йисуз чирвилер къачунин рекье, олимпиадайра ва государстводин имтигьанар вахкудайла, виниз тир агалкьунар хьайи аялриз тебрик авунин мярекат кьиле фена.
ИкI, алай йисуз Дагъустандин мектебрин 11 агъзурдалай гзаф аялри государстводин Сад тир имтигьанда иштиракна. Нетижада 34 иштиракчиди вини кьилин агалкьунар къалурна — абуру имтигьанар 100 балл къазанмишуналди вахкана, 26 выпускникди кьвед ва мадни гзаф тарсарай 95-99 балл къазанмишна.
Шад мярекатдал мектебар акьалтIарнавай жегьилар «чIехи уьмуьрдиз» рекье твадай насигьатдин келимаяр РД-дин Гьукуматдин Председателдин заместитель Муслим Телякавова лагьана.
«Эхиримжи вахтара чна математикадин ва тIебии илимрин рекьяй образование вилик тухунин месэлайриз кьетIен фикир гузва. Гьаниз килигна, цIи чахъ химиядай, биологиядай, математикадай ва информатикадай виниз тир агалкьунар хьанвай выпускникар гзаф хьуни иллаки рикI шадарзава.
Играми аялар, куьн виридалайни хъсанбур я! Дугъриданни, гьакI я. Куьне виридалайни гзаф кIвалахна, чун гзаф шадарзавай нетижайрив агакьарна. Сифтени-сифте заз квехъ мягькем сагъламвал ва жуван къуватрихъ инанмишвал хьана кIанзава. Къуй куь гьар са кам кьил-кьилеллаз, дериндай аннамишна хкянавайди ва важиблуди хьурай. Жуван вилик виниз тир макьсадар эцигиз ва абурухъди ялиз кичIе жемир», — лагьана ада.
Тебрикдин келимаяр гьакIни мярекатда иштиракай РД-дин Халкьдин Собранидин образованидин ва илимдин рекьяй Комитетдин председатель Елена Павлюченкоди ва РД-дин образованидин ва илимдин министрдин заместитель Аида Далгатовади лагьана.
Къейдна кIанда хьи, ГИА-дин нетижада 2025-йисуз республикада 582 кIвалахдиз 90 баллдин ва мадни виниз къимет ганва. Абурукай имтигьанрин 34 кIвалахди вини кьилин къимет — 100 балл къазанмишнава: химиядай — 19 кIвалахди, урус чIалай — 5, информатикадай — 5, пешекар математикадай — 3, обществознанидай — 1 ва литературадай 1 кIвалахди. 26 выпускникди кьвед ва мадни гзаф предметрай 95-далай 99 баллдал кьван къазанмишнава.
Адет хьанвайвал, 100 баллдин къиметар къачур аялриз 100 агъзур манатдин сертификатар ва РД-дин образованидин ва илимдин министерстводин патай чухсагъулдин чарар гана.
Амина Муслимова
