Выставка
И йикъара Дагъустандин халкьдин шаир СтIал Сулейманан тIварунихъ галай Ахцегьрин 1-нумрадин юкьван школадин еке дегьлизда, Россиядин халкьарин садвилин йисаз ва республикада светский сад лагьай мектеб ахъайна 165 йис тамам хьуниз талукьарнавай выставка ачухна. Идакай чаз муниципалитетдин администрациядин пресс-къуллугъди хабар гана.
РикIел хкин: 1861-йисан 26-сентябрдиз Самур округдин Ахцегьрин хуьре Дагъустандин хуьруьн чкайра сад лагьайди тир мектеб ачухнай. Ана 44 аялди чирвилер къачузвай, тарсарни урус ва азербайжан чIаларалди гузвай.
Къейд авун лазим я хьи, выставкада мектебда гьам гъвечIи ва гьамни чIехи классра чирвилер къачузвай аялри, гьамни муаллимрин кIвалахри лайихлу чка кьунва. 1-классра кIелзавай аялрин гъилералди гьазурнавай шейэри хьиз, чIехи классрин аялрин кIарасдал нехиш атIанвай ва куьлуь кагьрабайралди безетмишнавай кIвалахри тамашачийрин фикир желбзава. Мектебдин муаллим, художник Абдула Насрулаеван шикилри выставкадал мадни абур гъанва.
Выставкадиз тамашиз атанвай ксарин арада райондин кьил Абдул-Керим Палчаев, депутатрин собранидин, образованидин управленидин, жемиятдин тешкилатрин регьберар ва школада кIелзавай аялрин диде-бубаяр авай.
Выставкада эцигнавай мектебдин (ремонтдилай кьулухъ адан кIалуб чир техжедайвал дегиш хьанва) макет мугьманрин фикир иллаки желбдайди хьанва. Ам туькIуьрдайла вири куьлуь-шуьлуьярни кваз фикирда кьунва: эквер куькIуьрайла, Россиядин гимн язава, дараматдал Россиядин ва Дагъустандин пайдахри лепе гузва.
Абдул-Керим Палчаева выставка ачухун тебрикна. Райондин регьберди ва амай вири мугьманри адан тешкиллувилиз, ана къалурнавай кIвалахриз еке къимет гана, школадин коллективдихъ чIехи агалкьунар хьун алхишна.
Регина Семедова
