Дагъустандиз, Ингушетиядиз ва Кеферпатан Осетиядиз – энергетикадин ва ЖКХ-дин карханайрин кIвалах вилик тухун патал 1,8 млрд манатдин кьадарда аваз такьатар чара ийида. Идакай Россиядин Гьукуматдин телеграм-каналда хабар ганва.
И такьатрин куьмекдалди сифте нубатда коммунальный къурулушдин гьалдай фенвай объектрин кIвалах гуьнгуьна хутада. И жигьетдай кьабулдай гьар са серенжем республикада кардик квай сад тир операторди кьилиз акъуддайвал я.
Алай вахтунда талукь идарайри электричество ишлемишунай пул гун патал тайинарнавай тарифар экономикадин жигьетдай бине авайбур хьунин винел кIвалахзава. Тежрибади къалурзавайвал, абур виликанбурулай тафаватлу жеда. И кар фикирда кьуна, федеральный центради регионриз, тарифрин къиметриз талукь яз хьанвай дегишвилер себеб яз, муьштерийрив вахкана кIанзавай пулдин такьатар агакьариз куьмекда.
Дагъустанда, Ингушетияда ва Кеферпатан Осетияда энергетикадинни ЖКХ-дин карханайрин кIвалах вилик тухун патал тайин программа кьилиз акъудунив 2022-йисуз гатIунна.
Чи мухбир
