Куьмек гана кIанда
Кремлда 7-сентябрдиз Россиядин Федерациядин Президент Владимир Путин Дагъустан Республикадин Кьилин везифаяр вахтуналди тамамарзавай Федор Щукинахъ галаз гуьруьшмиш хьана. Идан гьакъиндай «Лезги газетдиз» РД-дин Кьилин пресс-къуллугъди хабар гана.
Республикадин регьберди РФ-дин Президентдиз мартдин ва апрелдин варцара селлерик акатай инсанриз куьмек гузвай, абурун чIуру нетижаяр арадай акъудзавай гьалдикай малумат гана. Гуьруьшдин вахтунда гьакIни яшайишдин имаратар эцигуникай, дяведин махсус серенжемдин иштиракчийриз ва абурун хизанриз куьмек гуникай ихтилат фена.
«Владимир Путин: Федор Вячеславович, кIвалахар гьикI я?
Федор Щукин: Къизгъин, амма лап итижлу я.
Владимир Путин: Гьелбетда, республика хъсанди, инсанарни гуьзелбур я.
Федор Щукин: Республика пара хъсанди, тажубардайди я».
Государстводин регьбердин ва Дагъустандин Кьилин арада суьгьбет гьа икI башламиш хьана. Федор Щукина сифте нубатда кар алай везифайрикай сад тир селлери ганвай зиянар арадай акъудзавай гьалдикай суьгьбетна. КIвалахар кьетIен гуьзчивилик ква ва тайинарнавай пландин бинедаллаз тамамарзава.
«Селлери зиянар гайи сифте варз пара четинди хьана. Зиянар гайи вири чкаяр лиледикай михьна, яшамиш жедай чка авачир агьалияр кIвалералди таъминарна, къайдадикай хкатнавай рекьер туькIуьр хъувуна. КIвалахдин кьвед лагьай пайни регьятди хьанач. Агьалийриз, майишатриз гайи зиянар тайинарна, пуч хьайи шейэр чкадал хкидай серенжемар кьабулна.
Федеральный талукь органри селлери гайи зиянар галай-галайвал тайинарна ва чна рекье твазвай документрин бинедаллаз республикадиз тайин кьадар финансарни къвезва», - лагьана Ф. Щукина.
Ада яшайишдин кIвалер хсусият яз регистрация тавунвай агьалийриз куьмек гунин кIвалах кьилди къейдна.
«За Куь фикир гьа и месэладал желб авурди тир. Гьелбетда, вири крар вахтунда тамамарна кIанда. Идан гъавурдани акьун лазим я. Эгер инсанар гьахьтин четин гьалда гьатнаватIа, абуруз куьмекни гана кIанда», – баян гана Президентди.
«Чна Куь тапшуругърал гьар юкъуз амалзава. Хуьруьн майишатдин чилерал алай дараматриз талукь яз чаз жемиятдин тешкилатри, меценатри куьмек гузва. Санлай къачурла, 3 миллиард манат кIватIна. Гьа и пуларикай чна кIвалер хсусият яз регистрация тавунвай, селлери зиян ганвай дагъустанвийриз куьмек яз чара ийизва. Куь тапшуругъар чна ян тагана кьилиз акъудда. Мадни лугьуз кIанзава хьи, гатфарин селлер жедалди регистрация тавунвай чилерин 60 процентни регистрация хъувунва. Абур кадастрдин учетдани эцигда», – лагьана Федор Щукина.
Владимир Путина яшайишдинни экономикадин хилера авай гьаларикайни хабар кьуна.
Республикадин регьберди малумат гайивал, Дагъустанда федеральный ва региондин вири программаяр уьмуьрдиз кечирмишзава. Федор Щукина кьилин хилерикай сад яз образование къейдна. Жегьилар гзаф авай республикада образованидин идарайрал пар акьалтзава. Бязи школайра гьеле 2 ва 3 лагьай сменайра кIелзама.
Гуьруьшдин вахтунда Владимир Путина Урусатдин халкьарин чIаларин югъ тир 8-сентябрдиз хайи халкьдин шаир Расул Гьамзатоваз кьилди дикъет гана.
«Машгьур дагъустанви Расул Гьамзатоваз кьетIен фикир гунай вири дагъустанвийрин тIварунихъай за Квез пара хушвилелди сагърай лугьузва. И сувар республикада, адет тирвал, гегьеншдиз къейдзавайди я. ЦIи вири уьлкве тирвал 75-дав агакьна мярекатар кьиле тухузва», – лагьана Ф. Щукина.
СВО-дин иштиракчийриз ва абурун хизанриз куьмек гунин месэладални кьилди акъвазна. Федор Щукина государстводин Кьилиз Дагъустанда СВО-дин ветеранрин кIвал арадал гъиз кIанзавайдакай лагьана. Владимир Путина и кардин тереф хвена ва дагъустанвийри дяведин серенжемда викIегьвилелди женгер чIугвазвайди къейдна.
Федор Щукина республикадиз датIана куьмек гунай В. Путиназ рикIин сидкьидай сагърай лагьана.
Россиядин Президентдихъ галаз кьиле фейи гуьруьшдикай гегьеншдиз Кремлдин официальный сайтдай кIелиз жеда.
Хийир Эмиров