4-августдиз РД-дин Гьукуматдин Председатель Мегьамед Рамазанов Ватан­дин ЧIехи дяведин иштиракчи Муса­ Багьаудиноваз мугьман хьана ва агъсакъалдив цIийи кIвалерин куьлегар­ вахкана. Премьер-министрди ветеран­диз цIийи кIвалер мубаракна­, Гъалиб­вал къачун патал къалурай ви­кIегь­вилерай сагърай лагьана, адахъ чандин сагъвални яргъи уьмуьр хьун алхишна.

Къейд ийин хьи, ветерандиз пишкешнавай цIийи кIвалер Каспийск шегьерда кьакьан гьавайринбура ава. Ина виликдай Муса Багьаудинов яшамиш хьайи кIвалерилай пара къулайвилер ава: гила ам вад лагьайда ваъ, сад лагьай гьавада жеда. Подъезддани къекъвез четинзавайбур патал махсус тадаракар кардик кутунва.

Гуьруьшдин вахтунда Муса Багьаудиноваз цIийи кIвалер, телефондай зенг авуна, РД-дин Кьилин везифаяр вахтуналди тамамарзавай Фёдор Щукинани тебрикна. Вичин нубатда ветеранди рес­публикадин регьбердиз юбилей мубаракна ва вичин гьакъиндай ихьтин къайгъударвилер авунай сагърай лагьана.

Муса Мусаевич Багьаудинов 1924-йисан 5-июндиз Акъуша райондин Бургимак хуьре дидедиз хьана. 1943-йисуз фронтдиз фена, са шумудра хирер хьана. Кеферпатан Кавказ хуьнин, Белоруссиядин­, Украинадин мулкар азад авунин женгера иштиракна. Дяведилай кьулухъ хейлин йисара колхозда кIвалахна. Ветеранди муьжуьд велед чIехи авуна. Къе ам 37 хтулдинни 44 птулдин чIехи буба я.

Агьмед Магьмудов