Алатай гьафтеда Махачкъалада Росгвардиядин Дагъустан Республикада авай Управленидин ОМОН-дин десте (отряд милиции особого назначения) (гила адаз ОМОН «Горец» лугьузва) арадал атана 34 йис тамам хьуниз талукьарнавай мярекат кьиле фена. Ана Росгвардиядин РД-да авай Управленидин начальникдин везифаяр вахтуналди тамамарзавай Башир Алимова, ОМОН-дин командир, полициядин полковник Рамазан Алиханова ва отряддин къуллугъчийри иштиракна.
ОМОН-ди асул гьисабдай кьилиз акъудзавай везифайрик терроризмдиз акси, тади гьалда гел жагъурдай, общественный хатасузвал таъминардай серенжемра иштиракун акатзава. РикIел хкин: Дагъустан, гьакI Кеферпатан Кавказдин регионар патални четинди тир 1991-йисан июндиз арадал атай отрядди республикада ислягьвал ва къанун-къайда хуьник еке пай кутазва, террористрин кIватIалри гьужумай макъамда ОМОН-дин къуллугъчийри къалурай кьегьалвилер тариф авуниз лайихлу хьана. Исятдани абуру чпин пак тIвар, пак буржи вини дережада аваз кьилиз акъудзава.
Мярекат ачухдайла, Б. Алимова Кеферпатан Кавказдин округдин командующий, генерал-полковник Владимир Спиридонован, Росгвардиядин Дагъустанда авай Управленидин начальник Александр Орехован ва вичин тIварунихъай омоновчийриз отряд арадал атай югъ — лишанлу вакъиа — тебрикна. Абуру гьа сифте йикъалай, сифтедай ана кIвалахайбурулай башламишна, республикада ва адалай къецени ислягьвал ва къайдаяр хуьн патал вилик эцигнавай везифаяр лайихлудаказ кьилиз акъудзавайди къейдна.
— Везифаяр хиве еке жавабдарвал аваз кьилиз акъудунай, пешедиз вафалувал хуьнай за квез, отряддин вири къуллугъчийриз, сагърай лугьузва. Къуй квехъ ва куь багърийрихъ чандин мягькем сагъвал, хизанра хушбахтлувал, гьар са карда агалкьунар ва кьилелни экуь цав хьурай! — алхишна ада.
Отряддин командир Рамазан Алиханова, вичин нубатдай яз, махсус подразделенидин къуллугъчияр Ватандин итижар хуьн патал гьар са декьикьада гьазур тирди къейдна.
— Къенин юкъуз завай инанмишвилелди лугьуз жеда: отрядди вилик эцигнавай гьар гьи жуьредин хьайитIани везифаяр, гьа гьисабдай яз общественный хатасузвал хуьн, махсус серенжемра иштиракун лайихлудаказ кьилиз акъудзава. КьетIендаказ заз ОМОН-дин ветеранризни сагърай лугьуз кIанзава. Куь кьегьалвални жуьрэтлувал амайбуруз чешне я. Куь тежрибади, чирвилери, камаллувили акьалтзавай несилдиз руьгьдинни ахлакьдин ва ватанпересвилин тербия гунин карда куьмекзава. За отряддин вири къуллугъчийриз сувар мубаракзава, квехъ чандин сагъвал ва хизанра хушбахтлувал хьана кIанзава. Гьакъисагъвилелди къуллугъ кьилиз акъудзавай куьн сагърай! — алава хъувуна ада.
Отряд патал лишанлу юкъуз кIвалахдин рекьяй тафаватлу хьайи къуллугъчийрив ведомстводин ва гьукуматдин дережайрин шабагьар, гьакIни къиметлу пишкешар вахкана.
Мярекат, кIватI хьанвайбур вири са декьикьада кисна акъвазуналди, кIвалахдин везифаяр кьилиз акъуддайла телеф хьайи юлдашрин экуь къаматар рикIел хкуналди, ОМОН-дин базадин гьаятда абуруз хкажнавай памятникдал цуьквер эцигуналди, отряддин къуллугъчияр кам-камуна аваз устадвилелди финалди акьалтIна.
Рагнеда Рамалданова
