Ватандин ЧIехи дяведин иштиракчи Азиз Себзалиевич Мухуров Ахцегь райондин Мацарин хуьре 1924-йисан 9-майдиз дидедиз хьана. Ада 1940-йисуз Хинерин хуьруьн мектебда 7-класс акьалтIарна, гуьгъуьнлай 6 вацра Дагъустандин Огни шегьерда оборонадин имаратрал кIвалахна. 1942-йисуз ада Буйнакск шегьерда гьа и рекьяй кIвалах давамарна.
РикIе душмандикай Ватан хуьдай къаст авай викIегь мацави 1943-йисан апрелдиз фронтдиз рекье гьатна. Ада Краснодардин пехотно-минный училищеда кIелна, артиллериядин звукометристар гьазурдай курсар акьалтIарна. Чирвилер къачунвай жегьиля пешекар Белоруссиядин фронтдик акатзавай 112-нумрадин разведовательно-звуковой дивизиондин алакъадин отделенидин командирвиле тайинарна.
Азиз Мухурова Польша, Венгрия, Румыния азад авун патал кьиле фейи женгера иштиракна. ЧIехи Гъалибвал ада вич хайи 9-майдиз Берлинда къейдна.
Азиз Мухурован шабагьрин чарче адан кьегьалвилерикай гегьеншдиз кхьенва:
«Младший сержант Мухурова акустикадин базадин начальникдин везифаяр тамамарзавай. И къуллугъдал ада вич кар алакьдай, пешедин гъавурда хъсандиз авай викIегь женгчи яз къалурна. Ам звуковой разведкадин батареяда виридалайни хъсан чешнейрикай сад я.
Одер вацIун кеферпатан къерехда батареядин дяведин имаратрал фашистри гьужумна. Сад лагьай звукопостовойдихъ галаз авай алакъадиз хасаратвилер хьанвай. Мухурова хар хьиз къвазвай душмандин гуьллейризни килиг тавуна, майдандиз экъечIна, алакъа кардик кухтуна. Нетижада душмандин вад батарея алай чкаяр тайинардай мумкинвал хьана, абурукай пуд чи артиллерияди тергна.
Берлинда кьиле фейи са женгина юлдаш Мухурова мад викIегьвал къалурна. Вичин уьмуьрдиз авай хаталувилизни килиг тавуна, ада алакъа кардик кваз хуьн патал акьалтIай кьегьалвал, вичин регьбервилик квайбуруз чешне къалурна. Адан куьмекдалди душмандин артиллериядин пуд батарея дуьздал акъудна, кьвед чи аскерри тергна.
Вичел ихтибарнавай везифаяр намуслувилелди кьилиз акъудунай юлдаш Мухуров «Яру гъед» орден гуниз лайихлу я.
Командир, гвардиядин майор.
1945-йисан 24-май».
Къуллугъдин рекьяй и командирдилай вине авай гвардиядин генерал-лейтенант Рожановича 1945-йисан 10-июндиз юлдаш Мухуров «Яру гъед» орден гуниз лайихлу тирди тестикьар хъувуна.
Вичин женгинин рекьяй мад са итижлу вакъиадикай Азиз Мухурова са мярекатдал, хуьруьнвийрин вилик рахадайла, ихтилатнай.
«Чун Германияда авай. Гвай алатар кIунтIал алай са кIвале эцигнавай. Инай немсерин кьушунар алай чкаяр капал алайбур хьиз аквазвай. Женг гатIунайла, «кьенерар» чи гъиле авай. Кардин гъавурда акьур немсер чун авай кIвализ тупарай гуьлле гуз эгечIна. Са снаряд гьатта кIвалин къенезни аватна. Хиялрай чна вирида чун телеф хьанвайди яз гьисабнавай. Амма бахтунай снаряд хъиткьиннач. Ам къени зи вилерикай карагзама», — сивик хъвер кваз суьгьбетдай ветеранди.
Ватандин ЧIехи дяведин йисара къалурай викIегьвилерай Азиз Мухуроваз «Яру гъед», Ватандин дяведин II дережадин орденар, «Жуьрэтлувиляй», «Варшава азад авунай», «Берлин къачунай», «Германиядин винел гъалиб хьунай» медалар ва хейлин маса шабагьар гана.
Дяведилай кьулухъ Азиз Мухурова сифте хайи колхозда шофер яз, гуьгъуьнлай Мегьарамдхуьруьн райондин Бут-Къазмайрал почтальон яз зегьмет чIугуна. Ветеран 2004-йисуз рагьметдиз фена. Адан экуь къамат чи рикIера эбеди я.
Баламет Ширинов
