Чпин хсусиятда эменни авай агьалийри, кьилди къачуртIа, квартираяр, яшайишдин кIвалер, гаражар, чилин  участокар ва транспортдин такьатар кIвачIихъ галай ксари алукьзавай 2-декабрдалди 2023-йисан налогар гун чарасуз я, тагькимарзава РД-да  авай Федеральный налогрин къуллугъдин управлениди.

«Гана кIанзавай налогдин кьадар къалурнавай чарар электронный къайдада интернетда авай «налогар гузвай касдин хсуси кабинетриз» ва «Госкъуллугъар» порталдиз рекье тунва. И къуллугъар ишлемиш тийизвай ксарив налогрин  гьа­къин­дай хабарар  почтадай агакьарнава.

Эгер налогрин санлай къачур кьадар 300 манатдилай тIимил ятIа,  ихьтин чарар рекье твазвач, амма абур пуд йис алатайла агакьарда. Налогар гуникай тамамдаказ азаднавай ксаризни  ихьтин чарар ракъурзавач», — гъавурда твазва идаради.

Къейдзавайвал, алай йисуз налогрикай хабар гузвай чарарик банкара хуьзвай такьатрилай къвезвай къазанжийрилай къачузвай налогни кутунва. Налог эцигнавай пулунал ваъ, адал атанвай «хийир­дин» процентрал илитIзава, гьа са вахтунда пулунин кьадар 150 агъзурдалай тIимил ятIа, адалай налог къачузвач. Анжах и кьадардилай артух тир къазанжийрилай (процентрилай) налог гун лазим я.

РикIел хкин, налогар гуз жедай рекьер са шумуд ава: ФНС-дин сайтда (nalog.gov.ru) авай «хсуси кабинет», телефонра жедай  «Налоги ФЛ» приложение, «Госкъуллугъар» портал, Россиядин Почтадин отделенияр, гьакIни банкунин терминалар.

Эгер налогар тайинарнавай вахтунда гун тавуртIа, вуч жеда? Эгер кIвачихъ атанвай налог вахтунда гун тавуртIа, ам буржуниз элкъвезва. Ахпа и кьадар буржунал гьар юкъуз пеня къвезва — адан кьадар Центробанкдин тайинарнавай вахтунда къуватда хьайи ставкадин кьадардилай (1/300) аслу я. Ихьтин ксариз  налогрин къуллугъди  хьанвай бурж гуьгьуьллудаказ  вахкунин гьакъиндай истемишун рекье твазва. Эгер и карни кьилиз акъуд тавуртIа, налогрин органри хьанвай бурж касдин эменнидин гьакъиндай эвез хъувун патал суддиз арза рекье твазва. И арзадиз килигунай  къачузвай гьакъини (200 манатдилай тIимил тушир пошлина)  налог таганвай касдин хиве гьатзава. Гьа икI, таганвай налогдилай гъейри, винел атанвай пулни кваз вири санлай суддин приставри вахчузва. Къейд ийин хьи,  ихьтин гьалдиз атанвай касдин аксина  са жерге сергьятвилерни кардик кутазва, гьа жергедай яз, — къецепатан уьлквейриз финал къадагъа эцигун, регистрация ийидай, гьакIни са жерге маса  ихтияррикай магьрум авун ва икI мад.

А. Муслимова