Дагъустандин Гьукуматда Украинада­ кьиле физвай махсус серенжемда иштиракзавай дагъустанвийриз гузвай пул абурув, энгел тийиз, вахтунда агакьаруниз талукь месэлаяр веревирдна. Вице-премьер Абдурагьман Магьмудован регьбервилик кваз кьиле фейи совещанида РД-дин зегьметдин ва яша­йишдин рекьяй вилик финин министр­дин заместитель Зураб Багьамедова­, ФНС-дин РД-да авай Управленидин кьилин заместитель Шагьбан Хизроева­, РД-дин военкоматдин векил Руслан Нурмегьа­медова, Сбербанкдин, Россельхозбанкдин, Промсвязьбанкдин ва ВТБ-дин къуллугъчийри иш­тиракна.

Гуьруьшдал малум хьайивал, СВО-да иштиракзавай бязи дагъустанвийрив пулдин такьатар вахтунда агакь тавунин кьилин себебрикай сад абурун банкдин картайрин рекъемар дуьзбур тахьун я. Военкоматдин векилди къейд авурвал, рекъемрин дуьзгуьнвал тайинарун патал­ неин­ки СВО-дин иштирак­чийриз, гьатта абурун мукь­ва-кьилийризни зенгер авуниз мажбур жезва. Бязи дуьшуьшра са касдихъ са шумуд банкдин картаяр аваз жезва, и кардини пул вахтунда агакьуниз манийвалзава.

А.Магьмудова къейд авурвал, Сергей Меликован буйругъдалди бюджетдай СВО-дин иштиракчийриз гузвай пулдин такьатар вахтунда ва герек кьадарда аваз чара ийизва. Адан фикирдалди, пул агакьарунин месэла энгел хьун и кардал машгъул жезвай идарайрин арада кIвалахдин жигьетдай авай алакъаяр дурумлубур тахьунихъ галаз алакъалу я. Ада и месэладиз кьетIен фикир гун ва СВО-дин иштиракчийрив вахт-вахтунда пулдин такьатар агакьаруниз манийвал гузвай вири себебар арадай акъудун тапшурмишна.

Чи  мухбир