Уьлкведин Президент Владимир Путина Кремлда гзаф аялар авай дидейриз «Игит диде» орденар гана. Абурун арада Дербент шегьердай тир Бурлият Межидовани авай.
Межидоврин хизанда 12 аялди тербия къачузва. ЧIехи аялдин 17 йис я. Лап гъвечIиди 2025-йисан декабрдин вацра дуьньядиз атана. Къадим шегьерда Межидоврин хизан милли адетрал амалзавайди, абур хуьзвайди ва аялривни агакьарзавайди, чIехибурув гьуьрметдивди эгечIзавайди яз гьисабзава.
И вакъиадиз баянар гудайла, Дагъустандин Кьилин везифаяр вахтуналди тамамарзавай Федор Щукина вичин телеграм-каналда къейдна: «Чи республикада гзаф аялар авай 140 агъзур хизан яшамиш хьун дуьшуьшдин кар туш. Чи виридан умуми буржи абурун гьакъиндай къайгъу чIугун ва абурун къула авай чимивал гузвай цIай садрани хкахь тийидайвал авун я».
* * *
Владимир Путина, тIебиатдин бедбахтвал себеб яз, кIвалерикай магьрум хьайи дагъустанвийриз 1-сентябрдалди яшайишдин рекьяй куьмек гун тапшурмишна.
Куьмек неинки кIвалер регистрация авунвайбурув, гьакI, талукь документар авачиз, яргъалди чпин кIвалера яшамиш жезвайбурувни агакьда.
Идаз талукь тапшуругъ Кремлдин сайтда ава.
Абад Азадов
