Дагъустандин писателрин с­оюздин дараматда «кьве халкь­дин шаир» тIвар акьалт­навай агъулрин сад лагьай ша­ир Камалдин Агьмедован 80 йисан юбилейдиз талукьар­навай шад мярекат кьиле фена. Межлис Союздин лезги сек­циядин председатель Максим Алимова ачухна.

– Кьудкьад йис идалай вилик, – лагьана ада, – Кьурагь райондин Хпуькьрин хуьре дидедиз хьайи агъулви Камалдина вичин сифтегьан шиирар лезги чIалал кхьена. Идан гъавурда акьунни регьят я. Кьурагь райондик агъулрин вад хуьр акатзава. Вири агьалияр лезги­ чIалални хъсандиз рахазва. Гьавиляй Камалдинани вичин ва­танэгьлияр хъсандиз  гъавурда акьазвай чIалал шиирар теснифна. Абур кIелдайбурув 1980-йисара лезги чIалал акъу­дай  «Жегьилрин сесер», «Къуьлуьн кьилер» уртах ктабра аваз агакьна. Жегьил шаирдин алакьунриз тIвар-ван авай шаирар тир Ибрагьим Гьуьсейнова, Азиз Алема, Мегьамед Агьмедова ва маса литераторри хъсан къимет гана. Гьа вахтунда адан «Муьгьуьббатдин лувараллаз» чIалариз машгьур композитор Мегьамед­ Гьуьсейнова музыка кхьена, маниди Дагъустандин вири пи­пIера ван авуна. Гьелбетда, ида жегьилдик мадни руьгь кутуна.

Мярекатдал Камалдин Агьмедован яратмишунрикай, ада агъулрин, лезгийрин ва санлай­ Дагъустандин эдебиятдик кутаз­вай паюникай Дагъустандин­ писателрин союздин председа­тель Марина Агьмедовади, пуб­лицист, писатель Нариман Иб­рагьимова, республикадин милли библиотекадин краеведенидин отделдин къуллугъчи Секинат Мусаевади, шаир, таржу­мачи Мурад Саидова, респуб­ликадин литературадин журналрин редакциядин кьилин редактор Мурад Агьмедова, писателрин союздин табасаранрин, лакрин, къумукьрин секцийрин председателри, Дагпедуниверситетдин муаллимри чпин фикирар лагьана. Мярекатдал шаирдин тIварцIихъ Дагъустандин халкьдин шаирар тир Арбен Къардаша, Фейзудин Нагъиева ракъурнавай тебрикар кIелна.

Дагтелерадиодин лезги пе­ре­дачайрин редактор Нарима­ Жамаловади «Муьгьуьббатдин­ лувараллаз» мани лагьана. Даг­педуниверситетдин студент­ри Камалдин Агьмедован шиирар хуралай кIелна.

Шаирдин веледри чпин бубадиз рикIел аламукьдай шад межлис тешкилай ва ана иштиракай виридаз рикIин сидкьидай сагърай лагьана.

Абад  Азадов