И мукьвара чав Вологдадин областдин Череповецда яшамиш жезвай, чпин ери-бине Мегьарамдхуьруьн райондин Гилийрилай тир Аиша Назмидиновадин ва Кира Мирзебалаевадин (абур халадин рушар я) алакьунрикай муштулухар агакьна. 2014-йисуз Череповецда ханвай, ина чIехи жезвай рушар каратэ шотокандал машгъул жез са тIимил вахт ятIани, къазанмишнавай гъалибвилери абурухъ хъсан гележег жедайдан гьакъиндай умудлувал гузва…
Рушари женгинин искусствойрин центрада (ЦБИ) тренер Александр Хаузован гъилик каратэ шотокандай вердишвилер къачуз алай йисан эвелра башламишна. Алатнавай тамам зур йисуз абуру кьведа 20-дав агакьна жуьреба-жуьре медалар къазанмишнава. ИкI, абурукай СЗФО-дин Кубокдин гимишдин медалрин сагьибар, шегьердин ва райондин уртах турниррин кIвенкIвечияр хьанва. Дугъриданни, спортдин таниш тушир жуьредай вердишвилер къачуз гила эгечIнавай абурун агалкьунри чи руьгь хкажзавай хьиз, пешекарриз спортдин и жуьреда мукьвал гележегда гъетер майдандиз акъатдайдан инанмишвални гузва. Гьа са вахтунда, чаз рушари хъсан нетижаяр къазанмишунин «сирерни» чир хьана. ИкI, Аиша ва Кира виликдай художественный гимнастикадал ва кьуьлер авунал са шумуд йисуз машгъул хьанай кьван. Абурухъ и жуьрейрайни агалкьунар ава. Мадни рушарик чпин диде-бубади руьгь кутазва.
Гаф кватай чкадал лугьун лазим я хьи, Аишадин чIехи вах Жасмин Назмидиновадикай художественный гимнастикадай Вологдадин областдин чемпионка садрани-кьведра хьанвач. Гьа икI, тренердин пешекарвили, рушари тренировкайра ашкъидалди иштирак авуни, абур ахъай тавуни, гьакIни аял чIавалай спортдихъ галаз «танишвили», жаванрихъ физический жигьетдай вижевай гьазурлухвал аваз хьуни каратэдани хъсан нетижаяр къазанмишдай вахт яргъалди гуьзетиз тунач. Каратэдал абурун рикI хьунин са сир чаз мадни ачух хьана. Имни, лугьудайвал, хизандин адетар давамарун я. Гилийрилай тир Полина Мирзебалаева – каратэ киокушинкайдай дуьньядин Кубокдин гимишдин медалдин сагьиб, Россиядин чемпионка ва Ильяс Мирзебалаев — Россиядин чемпионатдин буьруьнждин медалдин сагьиб, Дагъустандин чемпион халани халу рушариз халис чешнеяр я. Къуй чи гьар са ватанэгьлидихъ, абур яшамиш жезвай чкадилай аслу тушиз, чIехи агалкьунар хьурай!
Рагнеда Рамалданова
