И йикъара Дагъустанда кьиле фейи «Дагъвияр» фестивалда иштиракун патал Удмуртиядай республикадиз атанвай Россиядин лайихлу «Забава» ансамблдин коллектив 15-июндиз Мегьарамдхуьруьн райондиз мугьман хьана. Абур лезги чилел муниципалитетдин кьил Фарид Агьмедова ва администрациядин жавабдар къуллугъчийри кьабулна.
Фарид Агьмедова «Дагъвияр» фестивалдихъ жуьреба-жуьре халкьарин арада дуствилин алакъаяр мягькемарунин жигьетдай важиблувал авайди къейдна ва мугьманриз рикIел аламукьдай савкьатар пишкешна.
«Забава» ансамблдин коллективди, «Дагъвияр» фестивалдин сергьятра аваз, Мегьарамдхуьруьн районда «Дуьньядин ашукьар» лишандик кваз тешкилай суварикни иштиракна. Абуру гьакIни Мегьарамдхуьре Ватандин ЧIехи дяведа телеф хьайи кьегьалрин къамат эбеди авун патал эцигнавай обелискдал цуьквер эцигна, Ватан патал чанар къурбанд авур къагьриманрин экуь къаматар рикIел хкана.
Мугьманар патал чкадин администрациядин векилри Мегьарамдхуьруьн районда авай килигуниз лайихлу чкайра сиягьатни тешкилнавай. ИкI, Удмуртиядай атанвай мугьманар Приморский хуьре авай балугъар туьретмишзавай «Запкаспрыбвод» заводдизни фена.
Айшат Рашидова, ДГУ-дин магистрант
