Дагъустанда алай йисан эвел кьилерилай инихъ зирзибил гадардай контейнерар эцигун патал цIийи 489 майдан туькIуьрнава. Гьелелиг и жигьетдай пландик кутунвай кIвалахрин 94 % кьилиз акъуднава, – хабар гана саласа юкъуз Махачкъалада кьиле фейи Оперштабдин заседанидал.

РД-дин тIебиатдин ресурсрин ва экологиядин министрдин везифаяр вахтуналди тамамарзавай Ратмир Расулован гафаралди, алай йисуз республикадин шегьеррани районра, санлай къачурла, контейнеррин 1112 майдан туькIуьрун фикирдиз къачунва. Йисан сад лагьай паюна, план 520 яз, 489 майдан арадал гъиз хьанва.

И жигьетдай вилик квай муниципалитетрин арада Тарумовский, Къайтагъ, Дербент ва Унцукуль районар ава.

РД-дин Гьукуматдин Председатель Мегьамед Рамазанова къейд авурвал, зирзибилдин месэла агьалийрик къалабулух кутазвай кьилинбурукай сад я, гьавиляй ам гьялна акьалтIарун патал тайинарнавай вири серенжемар вахтунда тамамарна кIанда. И жигьетдай ада муниципалитетрин кьилеризни тапшуругъар гана.

Чи мухбир