25-майдиз Хасавюрт райондин ЦIийи Къурушрин хуьре рагьметлу имам, диндин машгьур деятель Мугьаммад гьажи Хидирован тIварцIихъ янавай цIийи мискIин ачухуниз талукьарнавай мярекат кьиле фена.

РикIел хкин, виликдай Мугьаммад гьажи Хидирова ЦIийи Къурушрин имамдин везифаяр тамамарзавай. 2015-йисан 9-сентябрдиз М.Хидиров, вичин 12 йис хьанвай хвани галаз экуьнин кпIунал мискIиндиз физвай рекье, дуьз рекьелай алатнавай вагьши къанлуйри, гуьлле гана кьенай. Ам кучудзавай юкъуз ЦIийи Къурушдал Дагъустандин ва Урусатдин маса регионрин шегьеррай вишералди динэгьлияр атанай.

Рагьметлу имамдин тIварцIихъ янавай мискIин ачухуниз талукьарнавай диндин межлисда Дагъустанда тIвар-ван авай динэгьлияр тир Али гьажи Саидгьуьсейнова, Магьди гьажи Абидова, Кьурагь райондин имам Шамил гьажи Омарова, машгьур общественный деятель Гьасен Балатова, Къурушрин хуьруьн кавха Рафик Юсупова, ‘Лезги газетдин’ кьилин редактор Мегьамед Ибрагьимова, ‘Къурушрин сес’ газетдин кьилин редактор Муса Агьмедова, Хасавюрт райондин депутарин Собранидин председателдин заместитель Мегьамед Лабазанова, РД-дин лайихлу духтур Нариман Салманова ва масабуру иштиракна.

Мярекат Сулейман-Стальский райондин имам Гьасан гьажи Амаханова кьиле тухвана.

Межлисдал рахайбуру Ислам диндикай гегьенш суьгьбетарна, рагьметлу имамди кьиле тухвай кIвалахар, адаз хас ерияр рикIел хкана. Са куьруь вахтунда (йисан къене) эцигна акьалтIарай мискIин хкажунин карда куьмекар гайи хейлин ксариз Къурушрин хуьруьн имам Азим гьажи Панагьова пишкешар яз Кьуръан ва дипломар вахкана.

Межлисдин эхирдай вири иштиракчийри саналди капI авуна.

(И мярекатдикай гегьеншдиз чи газетдин къведай нумрадай кIелиз жеда)

 

‘Лезги газет’