Рутул райондин Хъуьлуьдрин хуьруьн Культурадин кIвалин залда Виридуьньядин аялрин йикъан сувариз талукь яз лезгийрин машгьур композитор Мегьамед Гьуьсейнован тIварунихъ галай искусствойрин школадин коллективдин гьахъ-гьисабдин чIехи концерт кьиле фена.
Нянин сятдин вадаз хуьруьн клуб жемятдив ацIанвай. Эхь, инсанар хуьруьн майишатдин кIвалахрикай хкат тавун патал халкьдин иштираквал аваз тухузвай вири серенжемар ина няниз тешкилун адет я. Тамашачийрин арада хуьруьн ва райондин руководстводин векилар, дявединни зегьметдин ветеранар, мугьманар аваз аквазва.
Шадвилин мярекат искусствойрин школадин директор, РД-дин культурадин лайихлу работник Мира Гьуьсейновади ачухна. Гьахъ-гьисабдин концерт башламишдалди вилик ада школадин гьар йикъан кIвалахрикайни къайгъуйрикай, музыкадинни хореографиядин рекье аялрин агалкьунрикай, дагъви аялриз эстетикадин тербия гунин важиблувиликай суьгьбетна. Ахпа ада школадиз 3-4 аял ракъурзавай хизанриз сагърай лагьана ва ахьтин аялрин дидейриз — Сабина Алисултановадиз, Гуьлмира Абасовадиз, Альвина Ражабовадиз, Ийише Гьажиевадиз (ада аялрин дидейрин патай школадин муаллимрин коллективдиз сагърай лагьана) ва масабуруз чухсагъулдин чарар гана.
Хуьруьн аялар, куьчедин таъсирдикай хкудна, милли мани-макьамдинни кьуьлерин алемдиз желб авунин карда Мегьамед Гьуьсейнован тIварунихъ галай и школадин коллективди, гьакъикъатдани, еке зегьмет чIугвазва. И кардин гьакъиндай школадин аялрикай милли медениятдал рикI алай хъсан манидарарни кьуьлердайбур хкатуни ва абуру хайи хуьре, районда тухузвай саки вири мярекатра активвилелди иштиракуни шагьидвалзава. Бязибур райондин ва республикадин фестивалринни килигунрин, конкурсрин дипломантар я.
Гьахъ-гьисабдин концерт хореографиядин дестеди вижевай кьуьл тамамарунилай башламишна. Ахпа Шамсият Муфталиевади, Хадижат Гьажиевади урус чIалал пара устадвилелди манияр лагьана. Гуьгъуьнай сегьне гагь далдамчийрин, гагь кьуьлердайбурун дестейрин ихтиярда гьатзавай. Аялрин гьар са нумра гурлу капар ягъуналди кьабулзавайтIани, тамашачийриз иллаки Шамсият Муфталиевадин манияр, хореографиядин дестейрин “Лацу къушар”, “Лезгинка” кьуьлер, далдамчийрин алакьунар пара бегенмиш хьана.
Концертдин программа аялри чпин гъилералди цванвай парталар къалуруналди (парталар алаз абур сегьнеда къекъвезвай) давам хьана. Эхирдай Рутул райондин образованидин управленидин начальник Рамазан Афраимова, культурадин управленидин начальник Абдулла Абдуллаева, Хъуьлуьдрин хуьруьн администрациядин кьил Геннадий Агъамирзоева, хуьруьн юкьван чирвилерин школадин директор Муртаза Муртазаева, дяведин ветеран Шагьбан Мугъулова, дидевални аялвал хуьнин Комитетдин председатель Индира Салмановади, райондин “Рутулрин хабарар” газетдин кьилин редактор Байрам Мегьамедова ва масабуру искусствойрин школадин директор Мира Гьусейновадин ва адан регьбервилик квай вири коллективдин тIварцIихъ хуш келимаяр лагьана. “Къе чаз акурди дагълух хуьруьн аялрин ваъ, шегьердин дережадин концерт я. СССР-дин композиторрин Союздин член, РД-динни РФ-дин искусствойрин лайихлу деятель Мегьамед Гьуьсейнован тIварунихъ галай школада бажарагълу ватандашдин тIвар куьне вине кьунва. Якъин, гьа и аялрин арадани Мегьамед Гьуьсейнован рехъ-кар давамардай хьтин ксар ава”,- къейдна абуру.
Дашдемир Шерифалиев
