СтIал Сулейманан райондин духтурхана Дагъустандин здравоохра­ненидин сад лагьай нарком хьайи Рза Саидович Шихсаидован тIвар­цIихъ яда. Ихьтин къарар РД-дин кьилин патав кардик квай машгьур дагъустанвийрин экуь къамат эбеди авунин комиссиядин заседанидал кьабулна.

Медицинадин рекьяй кьилин образование къачур сифтегьан дагъвийрикай сад тир Рза Шихсаидован бинеяр СтIал Сулейманан райондин Агъа Хъартасрин хуьряй я. Ада 1916-йисуз Петербургдин военно-медицинский академия акьалтIарна. Рза Шихсаидова Дуьньядин сад лагьай дяведа  иштиракна. Ана хирер хьанвайбур сагъар хъувунай баркаллу дагъустанвидиз Георгиевский IV дережадин медаль ганай.

1918-йисуз Дагъустандиз хтайла, ада Куьре округдин духтурханадиз­ регьбервал гана, 1921-йисуз ДАССР-дин здравоохраненидин сад ла­гьай­ наркомдин везифайрив эгечIна. Къиздирмадин тIегъуьн пайда хьайи чIа­вуз пешекар духтурди халисан игитвал къалурнай: азардиз акси дарманар кьит тирвиляй Рза Шихсаидова ватанэгьлияр къутармишун патал жуьреба-жуьре хъчарикай дарманар гьазурна.

"Лезги газет"