Россиядин Федерациядин Президент Владимир Путинан Указдалди, Украинада кьиле тухузвай махсус серенжемда командирри вилик эцигзавай тапшуругъар викIегь­вилелди, гьавурда аваз тамамарзавай сержант  Ферхатов  Сефибег  Седрединовичаз  Суворован медаль гана.

Сефибег Мегьарамдхуьруьн райондин Муьгъверганрин хуьряй я. Чкадин юкьван школа куьтягьна, ам армиядиз фена. Воронеждин десантдин частара чешнелудаказ къуллугъ авур аскердиз командирди къуллугъ давамарун теклифна. Багърийрал алукьайдалай гуьгъуьниз Ферхатова контракт кутIунна. Взводдин командирвилин везифа хиве гьатай сержант жегьил аскерриз военный рекьяй вердишвилер гунив гатIунна.

Украинада махсус серенжемдив эге­чIайла, Воронеждин частарни Донбассдин мулкар­ нацистрикай, фашистрикай азад ийиз рекье туна. Сефибег Ферхатовни гьа сифте йикъа­ри­лай, кьетIен тапшуругъ тамамариз, До­нецк­дин Республикада ава. Ада вичин юлдашрихъ, взводдин аскеррихъ галаз гьар йи­къан тапшуругъар дуьм-дуьз кьилиз акъудзава ва До­нецкдин ислягь агьалияр, аялар, кьуьзуьбур­ къирмишзавай фашистар Донбассдин хуьрерай, шегьеррай чукурзава, ахкъудзава. Нубатдин женгина Сефибегал хер хьана. Белгороддин областда хер сагъарзавай кьегьалдив ко­мандирдилай медаль ганвайдан хабар агакьна ва гьа са вахтунда викIегь сержантдиз­ хуьруьз, багърийрин патав хъфинин, лазимвал атай­тIа, ахпа эхвердайдакай лагьана. Ам­ма Се­фибега малумарна. “Багърийрин па­тав­ зун гъалиб хьайила хъфида. Зун ана женги­нин юлдашри, зи аскерри гуьзетзава. Абур ана туна завай хуь­руьз хъфиз жедач”.

ИкI лугьунихъ, Ватандиз, буржидиз вафалувал къалурунихъ себеб авай.  Сефибеган дах Седредина дагъдин пияда кьушундик кваз йисни муьжуьд вацра Афгъанистанда, Мазара-Шерифда, интернациональный буржи тамамарайди я. Душмандихъ, моджахедрихъ га­лаз кьиле фейи женгера къалурай кьегьалвилерай Седредин Ферхатоваз “Жуьрэтлувиляй” ва Афгъанистандин медалар гана.

Сефибеган имияр тир Феридани — Афгъа­нистанда, Нежведина Къазахстанда уьтквемвилелди къуллугъна. Жегьилдин вилик чешне къачудай кьегьалар ква. Бубадин ва имийрин­ тIвар, кар вине кьазвай, рикI ватанпересвилин руьгьдив ацIанвай сержант къуллугъ да­вамариз, Россиядин армияда акъвазна. Гила, мумкинвал ганвайтIани, кIвализ хтун тавуна, Донбассдиз женгинин юлдашрин патав хъфизва. Мадни къуватар, сагъвал гурай­ чи кьегьал хциз — сержантдиз.