Алатай гьафтеда Будапешт шегьерда (Венгрия) азаддиз юкьварар кьунай «Имре Пойяк и Янош Варга» UWW» лишандик кваз кьиле фейи турнирда чи ватанэгьли, Грециядин патай экъечIзавай Даурен Куругълиевавай, кIвачиз хьайи тIарвал себеб яз, бягьсер давамариз хьанач.
Ярумчух финалда США-дай тир спортсмен Трент Хидлеяхъ галаз гатIунай бягьсинин сад лагьай декьикьада Даурен Куругълиеван кIвачиз тIар хьана. Грециядин командадик кваз Олимпиададин къугъунра кишпирдин медаль къачур чи ватанэгьлидихъ бягьс давамардай мумкинвал хьанач. Эгер, тIварвал тахьана, ам ярумчух финалда гъалиб хьанайтIа, финалда Даурен Куругълиева Азербайжандин патай экъечIзавай дагъустанви Абубакр Абакаровахъ галаз бягьс кьиле тухудай.
«Бязи дуьшуьшра кьисметдихъ вичин сегьнеяр ава ва икI вучиз жезватIа, чун гьамиша гъавурда акьазвач. ТIарвилер чи дурумлувал, руьгьдин къуват ва жув-жувахъ агъун ахтармишзавай имтигьанар я.
Эхь, къе жуваз кIандайвал хьанач. Эхь, неинки са бедендиз, гьакI рикIизни тIар хьана. Амма гьа ихьтин легьзеяр себеб яз, чун вилик физва, къуватлу жезва ва макьсаддихъ физвай гьар са камуниз къимет гузва.
ДатIана захъ рикI кузвайбуруз за сагърай лугьузва. Им эхир туш, кьисметдин цIийи чар я. Къуватлу хьана хкведа», — лагьана Даурен Куругълиева, вичин кIвачиз хьанвай тIарвилиз баянар гудайла.
Къуй чи викIегь ватанэгьли фад-фад сагъ хъхьурай ва адахъ чи рикIер шадардай мадни еке агалкьунар хьурай. Амин!
Агьмед Магьмудов
