Сентябрдин 12-15-йикъара Дагъларин уьлкведин меркезда РД-дин милли сия­сатдин ва диндин крарин рекьяй минис­терстводи тешкилнавай республикадин терроризмдиз акси форум кьиле фена. Москвадай, Санкт-Петербургдай, Пятигорскдай, Калининграддай ва маса регионрай атанвай экспертрин иштираквал аваз, кьилди-кьилдин секцийра кIвалах тухвайдалай гуьгъуьниз форумдин кьилин мярекат Дуствилин кIвале дава­марна.

Сифте гаф рахуналди, Дагъустан Рес­публикадин Кьилин везифаяр вахтуналди тамамарзавай Федор Щукина терроризмдиз талукь месэладикай республикадин вири агьалийриз хъсандиз хабар авайди къейдна.

– Чун къе и мярекатдиз кIватI хьанвай­дини (чIехи зал сиве-сивди инсанрив ацIан­вай) «Терроризмдиз – ваъ!» лугьун патал я. Дагъустандиз ибур кьуру гафар туш. Чаз виридаз лап хъсандиз чизва, республикадин хатасузвал, агьалийрин секинвал хуьн патал гьихьтин къурбандар авурди ятIа. Терроризмдин гьерекатрикай, къурхуйрикай республика ва чи чIехи Ватанни хуьн патал, чпин чанарин гьайиф татана, женгиник экечIай кьегьалар чи рикIел алама. Алай вахтунда Ватандин итижар неонацистрикай хуьзвай дяведин махсус серенжемда игитвилелди женг чIугвазвай къагьриманарни чи рикIе ава. Абурун игитвилер ва зегьмет чун патал хъсан чешне я, – лагьана Ф. Щукина.

Региондин Кьили мадни давамарна: «Терроризм санал акъвазнавач. Ада вичин­ суфат дегишарзава. Къе ягъунар, хъиткьи­нарунар, важиблу идарайрал гьужумар тIи­мил хьанватIани, терроризмдин идеология­дин сагьибри чахъ галаз информация­дин дяве къалинарзава. Алай вахтунда­ абурун яракь – тапарар авун, провокацийрик кьил кутун, агьалияр, иллаки жаванар, жегьилар алдатмишун я. Гьавиляй чна чи агьалийрихъ галаз тухузвай таблигъатдин кIвалах артухарун лазим я. Чи инсанар душманрин таъсирдик акат тийидайвал».

Форумдин пленарный паюна СКФО-да Президентдин векилдин заместитель Андрей Конина, терроризмдиз акси милли комитетдин векил Виталий Малышева, Да­гъустандин прокурор Денис Андреева, РД-да авай РФ-дин силисчивилин управленидин регьбер Александр Спруна ва маса ксари иштиракна, абуру терроримздин аксина тухузвай кIвалахдикай чпин фикирар лагьана.

– Терроризмдиз акси кIвалах тешкилунин карда муниципалитетрилай гзаф крар аслу я, – лагьана В. Малышева. – ГьикI ла­гьайтIа, муниципалитетрин регьберар, къуллугъчияр датIана агьалийрихъ галаз алакъада ава. Абуруз чпин мулкунал вуч ва гьикI кьиле физватIа малум я. Гьинай хаталувал аквазватIа, тади серенжемарни кьабулиз жеда. Агьалийрихъ галаз терроризмдин идеологидияз акси кIвалах тухунин жигьетдайни абурун мумкинвилер екебур я.

МГИМО-дин ахтармишунрин международный институтдин илимдин къуллугъчи Сергей Маркедонова форумдин иштиракчийрин фикир маса месэладал желбна.

– Садани терроризмдин къурхулувал амукьдач, ам квахьда лагьана фикирмир. Ваъ, дуьньяда исятда кьиле физвай вакъи­айри успатзавайвал, терроризмдин гьере­катар, къурхуяр масадбур жеда. И чIуру гье­рекат­дик мадни гзаф инсанар акатда. Чи везифа авунвай тахсиркарвилериз фикир гун ваъ, жезвай пис гьерекатар виликамаз акун, кьа­тIунун ва абурун вилик пад кьун я.

Абад  Азадов