3-июндиз РФ-дин  экономикадин рекьяй вилик финин министр Сергей Назарован регьбервилик кваз совещанидал Кавказдин инвестицийрин форум (КИФ)  тешкилунин ва кьиле тухунин месэла веревирдна.  Видеоконференциядин къайдада совещанида РД-дин  экономикадин  ва мулкар виликди тухунин министр Гьажи Султанова иштиракна.

РикIел хкин, алай йисуз Кавказдин инвестицийрин форум 15-17-июлдин йикъара Грозныйда кьиле фида. Форумдин программа регионрин патай  атай теклифар гьисаба кьуналди туькIуьрзава.

Форумдин стратегиядин сессийрикай сад дагълух мулкар виликди тухунин месэладиз талукь жеда. Ам кьиле тухунин теклиф РД-дин Гьукуматди ганва. Сессияда иштиракун патал СНГ-дин,  гьакIни къецепатан са жерге маса уьлквейрин векилриз теклифнава.

Веревирд ийидай месэлайрик ква: дагълух мулкар виликди тухунин месэла государстводи гуьнгуьна тун ва куьмек гун, дагълух чкайрин агьалийрин дуланажагъ хкажун ва абур яшайишдин рекьяй хуьн, экономикадин, яшайишдин, демографиядин жигьетдай гьалтзавай четинвилер, дагълух мулкар виликди тухунин карда культуради, адетри къугъвазвай роль ва икI мад.

Амина  Муслимова