Советрин девирда, са куьникайни къурху авачиз, виридаз кар-кIвалах, фу аваз, са стхаяр хьиз яшамиш жезвай чи сад тир гьулдан хьтин гьукуматдин халкь къаних США-дин, ЦРУ-дин, дуьньядин империализмдин чIулав къуватри пайи-паярна.
РикIел алама, алатай асирдин 80-90-йисар гьихьтин четинбур хьанайтIа. Чи арадиз гьа вахтара, “перестройка”, “приватизация”, “демократия”, “ваучер” ва маса гафар гъана, чи къудратлу гьукумат дарбадагъна. Социализмдин зурба къазанмишунар вара-зара авуна, карханаяр, банкар тарашчийри чпин хсусиятдиз элкъуьрна. Гьихьтин четинвилер, туькьуьлвилер хьанатIани, Аллагьдиз шукур, чалай чIулав булутар, са артух дявеяр, кьиникьар тахьана, алатна…
“Вун ви чкадал ацукь!” лугьудай къудратлу СССР амачирла, США-ди, НАТО-дин членри чIуру ниятралди, къастаралди вири дуьньядин майданда гьихьтин фитне, гъулгъула тунватIа, килиг садра. Абуру чпиз муьтIуьгъ, аслу туширвилин сиясат тухузвай гьукуматрин кьилер, квачир тахсирар кутаз тергзава.
Аквадай гьаларай, США-диз НАТО-дин уьлквейриз, виликдай хьиз, дуьньяда колонияр арадал хкиз, адалатсуз къайдаяр хутаз кIанзава. США, НАТО Югославиядин къенепатан крарив векъидаказ хкуькьна, ана фитне, цIай туна, С.Милошевич Гаагада гьахъсуз кьена. Иракдин кьиле 1979-йисалай халкьди разивилелди хкянавай Саддам Гьуьсейн авай. Ада вичин халкь, гьукумат хвена, экономика, яшайишдин дережа хкажна, низам-къайда туна. США-дин вилик гардан кIирнач.
США-динни Англиядин дяведин къуватар, международный вири ихтиярар чIурна, Иракдиз сухулмиш хьана, са тахсирни квачир агъзурралди инсанар кьена, Саддам Гьуьсейн тарагъажриз акъудна. 2010-йисуз США-ди, НАТО-дин уьлквейри Ливиядал гьужумна. Нетижада 50 агъзурдалай виниз инсанар кьена. Вичин гьукумат, халкь вини дережадиз акъуднавай, уьлкведин экономика халкьарин яшайиш виниз хкажнавай, образование, медицина, яшайишдин кIвалер, эквер ва маса регьятвилер халкьдиз пулсуз ганвай гьукуматдин кьил Муаммар Каддафи ва адан рухваяр пучна. Бес им вагьшивал, инсафсузвал, виридак къурху кутун тушни?!
Идалай гуьгъуьниз США-дин, ЦРУ-дин кьацIай планрик Сирия, Иордания, Иран, Украина акатна. США-ди, чинеба кьадай кицIи хьиз, Украинадани хаинвилелди вичин мурдар политика тухвана. 2014-йисуз халкьди хкянавай гьукуматдин кьил Янукович къерехна. Идан нетижани гьихьтинди хьанатIа, чаз аквазва.
Алай вахтунда Россияди кьиле тухузвай махсус серенжем гьахълуди я. Чун гъалибни жеда. США-дин, ЦРУ-дин политика сад я: дуьнья вичиз муьтIуьгъарун. Тахьуй, залум, вакай дуьньядин агъа!!!
Рамазан Велибегов,
РФ-дин писателрин ва журналистрин Союзрин член
