21-июлдиз Махачкъалада кьиле фейи совещанидал РД-дин Кьилин везифаяр вахтуналди тамамарзавай Фёдор Щукина чиновникри чпин докладра, чиз-чиз, къастуналди делилрин гьа­къин­дай дуьз тушир малуматар къейд авунал эхир эцигун герек тирдакай лагьана.

«Заз аквазва, бязи регьберар гилани куьгьне къугъунар давамариз алахъзава – ягъалмишарзава, гьялна кIанзавай мес­элаяр жуьреба-жуьре метлеб квачир, гьакI алудун патал кхьизвай чарарик чуьнуьхзава, гьял тавунвай месэлаяр гьакъикъатда гьялнавайбур яз къалурзава.

Виликамаз хабардарзава, вични са сеферда: таб ийиз алахъун гъалатI туш, ам инсанрин итижар маса гун, хаинвал авун я. Ахьтинбуруз авайди са рехъ я: къуллугъдилай элячIун», – лагьана Ф. Щукина.

Республикадин Кьили совещанида­ иштиракай чиновникрикай са нихъ ятIа­­ни кIва­лахдин рекьяй четинвилер­ ава­тIа, вичиз­ хабар гун тIалабна. Авай мес­элаяр санал­ гьялдайвал. «Амма­ куьне табзаватIа, гьа­къикъи гьалар чуьнуьхза­ватIа, гьакI къейдер патал авачир рекъе­мар кхьиз­ва­тIа, чун са рекьин юлдашар туш», – алава хъувуна ада.

Ф. Щукинан гафаралди, кьвед лагьай сеферда умуд кутаз жедай мумкинвилер, гьахълу ийидай делилар ва я маса шартIар жедач. Ада гьакIни къейд авурвал, ни гьукуматдин къуллугъ хсуси хийир­дихъ галаз какадарзаватIа (яни, гьукуматдин къуллугъдикай даях кьуна, къанунсуздаказ «жибин ацIурун» – ред.), ахьтинбурухъ галаз гьасятда къа­къатда.

«Заз четинвилериз дурум ва нетижайрин патахъай халкьдин вилик жаваб гуз жедай, алакьдай регьберар герек я. Чарарал иердиз гьахъ-гьисабдин рекъемар чIугваз жедай суьретчияр ваъ! Ке­фина эця тийиз, кIандайвал садавни ­ийиз тадач», – къейдна республикадин Кьили. 

Агьмед Магьмудов