Дагъустандин Яшайишдин фондуни виликдайни хабар гайивал, Украинада кьиле физвай дяведин махсус серенжемда иштиракзавай дагъустанвийривай, алай йисалай башламишна, Россиядин Яшайишдин фондунин реабилитациядин центрайра, санаторийра ва курортра чпин сагъламвал пулсуздаказ гуьнгуьна хутаз жеда. Реабилитациядин центрайра абур патал (абурун тIарвилериз ва азардиз килигна) махсус программаяр арадал гъида, абурай сагъарда. Медицинадин делилрал асаслу яз, абур сагъардай йикъарин кьадарни тайинарда. Пландик квайвал, СВО-дин иштиракчидилай гъейри, адахъ гелкъвезвай касдизни ихьтин мумкинвал жеда.
Реабилитациядин центрайра сагъламвал гуьнгуьна хутаз кIанзавайбурувай, Дагъустандин Яшайишдин фондунин муьштерийрихъ галаз кIвалахдай къуллугъриз ва я МФЦ-диз фена, гьакIни «Госкъуллугъар» порталда арза гуналди, направление къачуз жеда. Гьар са арзадин гьакъиндай пешекарри кIвалахдин 2 йикъан къене къарар кьабулда ва арза ганвай кас хабардарда.
— Арзадихъ галаз сад хьиз, а касдив медицинадин идаради сагъламвал гуьнгуьна хтунин лазимвал авайди ва реабилитация кьиле тухунин, курортдани санаторийра ял ягъунин жигьетдай къадагъа (противопоказания) авачирди тестикьарзавай документар хьун лазим я. Эгер СВО-дин иштиракчидив ахьтин документар гвачиз хьайитIа, СФР-дин Дагъустанда авай отделениди абур а кас хьайи медицинадин идарадивай тIалабда. Арза гайи кьве йикъан вахтунда и жигьетдай, яни санаторийда, курортда ял ягъунин ва медицинадин реабилитация кьиле тухунин гьакъиндай направление гунин къарар кьабулда, — хабар гузва мадни малуматда.
Реабилитациядин центрайриз рекье тунин къуллугъ мадни хъсанарун патал СВО-дин иштиракчийриз анриз фин-хтунин харжийрайни пул вахкузва. Амма и кар тестикьарзавай документар къалурун лазим я. Харжияр поезддин, самолётдин, цин транспортдин, автобусдин билетрай хьиз, жуван хсуси автомашинда аваз фейилани вахкузва.
РикIел хкин: СВО-да Россиядин Игитвилин тIварцIиз лайихлу хьайибуруз ва 1-группадин инвалидриз направление учир авачиз гуда.
Эгер и ва маса месэладин гьакъиндай суалар пайда хьайитIа, абуруз жавабар СФР-дин Дагъустанда авай отделенидин алакъадин сад тир центрадиз телефондин 8 800 100-00-01 нумрадиз зенгна, чириз жеда. Зенг авун пулсуз я.
Чи мухбир
