«Ахцегьрин ичер» фестивалдин серенжемрин сергьятра аваз сувариз эхиримжи гьазурвилер аквазвай юкъуз райцентрадин «Набережный» багъда жемятдик гьерекат квай. Абуру, гъиле яракь аваз, Ватан хуьзвай СВО-дин иштиракчийриз, суварин мергьяматлувилин савкьат яз, «Камаз» машиндиз ичерин пар язавай. Белгороддин областдин кьушунрин са частунин «Камаз» машин Ахцегь районда республикадин «Память гор» общественный тешкилатдин векил, СВО-дин ветеран Абубакр Вагьабован теклифдалди гъанвай.
Мергьяматлувилин и серенжемдикай чаз райондин администрациядин хуьруьн майишатдин отделдин начальник Ленонард Атлуева суьгьбетна.
— «Жемятдин къажгъан муркIадални ргада» лугьудайвал, аквазва хьи, къе вири кардик ква. И сувариз чкадин идарайринни карханайрин кьиле авайбурал гьар садал са кар тапшурмишнава. Абдул-Керим Нажмудиновича зи хиве виридалайни суваб авай везифа тунва. Районэгьлийри кьве сятдин къене 400 ящикдилайни гзаф хъсан ичер гъана, машин ацIурна. Жемят пара кьадар сагърай! Чна СВО-диз дяведа герек маса шейэр авай «Газель» машинни рекье твазва. Машинрихъ галаз Белгороддин областдиз чи векил Абубакр Вагьабов физва.
Жемятди михьи рикIелди садакьа яз рекье твазвай няметар Аллагьди кьабулрай! Дяве чи гъалибвилелди куьтягь хьана, чи баркаллу рухваяр сагъ-саламатдиз, хуруйрал женгинин орденарни медалар алаз хкведайвал хьурай!
Дашдемир Шерифалиев
