Алатай гьафтедин ял ядай йикъара СтIал Сулейманан райондин КIварчагърин хуьре, Гь. Аллагьвердиеван тIварунихъ галай бокс вилик тухудай центрада, Ватан хуьдайбурун йисан сергьятра аваз, Украинада кьиле физвай дяведин махсус серенжемдин игит, полковник Марат Гьажибалаеван экуь къаматдиз бахшна, райадминистрацияди районрин уртах прокуратурадихъ галаз санал боксдай жаванрин арада республикадин 1-турнир тешкилна. Ана Дагъустандин ва Кьиблепатан Дагъустандин хкянавай командайри чпин устадвал къалурна.
Жаван спортсменрин тIварунихъ чими келимаяр лугьуз, гьакIни абурув шабагьар вахкуз, КIварчагъ дередиз багьа мугьманарни атанвай. Абурун арада Дагъустандин вице-премьер Нариман Абдулмуталибов, Халкьдин Собранидин депутат Марат Алияров, райондин кьил Саид Темирханов, адан 1-заместитель Заур Къагьриманов, районрин уртах прокуратурадин прокурор Мегьамед Залбегов, машгьур спортсменар ва масабур авай.
— Жуьрэтлувилин ордендин кавалер, полковник Марат Мугъулович Гьажибалаеван экуь къаматдиз бахшна, къе чна республикадин дережадин 1-турнир кьиле тухузва. Уьмуьрдин эхиримжи нефесдалди ада уьлкведин итижар, хатасузвал хуьник вичин лайихлу пай кутуна. Чи уьлкведа Ватан хуьдайбурун йис гьа ихьтин ватанпересриз талукь яз малумарнава.
Къенин юкъуз чи райондай 600-далай виниз кьегьалри дяведин махсус серенжемда иштиракзава. Идалди Ватандин ЧIехи дяведа чпин чанар гайи, гъалибвал къазанмишай чи чIехи ва ата-бубайрин пак адетар хуьзва. Чна чи кьегьалриз дяведин махсус серенжем гъалибвал къазанмишуналди жезмай кьван фад акьалтIун, Россиядин баркаллу суваррин календарда лишанлу мад са югъ пайда хьун алхишзава. Къенин турнирдин макьсад, гъалибчияр майдандиз акъудун хьиз, Ватандин азадвал патал чанар гайибурун ва алай вахтунда женгина авайбурун кьегьалвилерни раиж авун я. Заз СтIал Сулейманан райондин администрациядин ва районэгьлийрин тIварунихъай вири спортсменрихъ ва абурун тренеррихъ агалкьунар хьана кIанивилин келимаяр лугьуз кIанзава. Къуй жаван спортсменрикай чи зурба уьлкведин лайихлу рухваяр хкатрай, абурухъ, спортда хьиз, уьмуьрдани еке агалкьунар хьурай! — алхишна С. Темирханова.
Къизгъиндаказ кьиле фейи акъажунрин нетижада Кьиблепатан Дагъустандин команда 12:10 гьисабдалди гъалиб хьана.
Рагнеда Рамалданова
