31-мартдиз Мегьарамдхуьруьн райондин Советский хуьруьн стадиондал, сив хуьнин сувариз талукьарна, волейболдай районрин командайрин арада акъажунар кьиле фена. Абур хуьруьн мискIиндин имамдин куьмекчи, спортдал рикI алай, спорт ва халкьди сагълам уьмуьр тухунин таблигъат машгьурзавай Герейханов Саида кьил кутуналди тешкилнавай. Ахцегь, Кьурагь, Хив, Мегьарамдхуьруьн районрай атанвай спортсменар ва кIватI хьанвай инсанар суварин гьуьрметдай наз-няметралди безетмишнавай суфрайрихъ къаршиламишна. Акъажунра Советский хуьруьн кьил Асваров Эмирагъади теклифна атанвай, судьявилин категория авай филиви Жабраилов Физулиди судьявал авуна.
Къизгъиндаказ кьиле фейи къугъунра 1- чка кьур Советский хуьруьн команда (капитан — Омаров Эльдар), 25 агъзур манат ва Кубок гуналди, хуьруьн мискIиндин имам Пашаев Сулейман гьажиди тебрикна. 2-чка кьур Кьурагьрин команда, 20 агъзур манат пул ва Кубок гуналди, — Советский хуьруьн поселенидин кьил Асваров Эмирагъади. 3-чка кьур Ахцегьрин команда, 15 агъзур манат пул ва Кубок гуналди, — Советский хуьруьн волейболдин спортдай ветеран Гьасанов Мегьамеда. 4-чка кьур Хив райондин «АрхитI» командадиз теселлидин пишкеш гана. Мадни Къарибов Ремзи («Лап хъсан тренер»), Юлчиев Эдуард («Лап хъсан къугъвадайди»), суварин тIуьн-хъун тешкилунай Гьасанов Леонард грамотайризни пулдин пишкешриз лайихлу хьана.
Эхирдай Герейханов Саида ва Асваров Эмирагъади акъажунрин спонсорар тир «Т9» кофейнядин директор Гьабибов Жавидиназ, сурарин къванер гьазурзавай фирмадин директор Гьашумов Давудаз ва яргъал рекьерай атанвай спортсменриз сагърай лагьана, абурухъ гележегда мадни еке агалкьунар хьун алхишна.
Сулейман Пашаев
