Фадлай Дагъустандилай къецепатани машгьур хьанвай­ писатель Наира Алидес С. Мар­шакан тIварцIихъ галай кесерлу премиядин финалдиз кьвед лагьай сеферда акъатнава.

Бинеяр СтIал Сулейманан райондай тир, алай вахтунда ДГПУ-да кIвалахзавай филологиядин илимрин доктор Наира Алидеса премиядин «Гьикаят» номинациядиз аялар патал урус чIалал кхьенвай «Кольцо Джанавура» ктаб теклифнавай. Нетижада адан зегьмет уьлкведа виридалайни хъсанбурукай сад яз гьисабнава.

Кьвед лагьай сеферда уьл­кведин дережада аваз тешкилнавай ихьтин чIехи конкурсдин финалдиз акъатуни Наира Алидесан пешекарвилин, устадвилин гьакъиндай шагьидвалзава. И кар жюридизни такуна амукьнач.

Къейд ийин хьи, «Кольцо Джанавура» ктаб Дагъустандин эдебиятдин тарихда эдебиятдин махарин сад лагьай кIватIал я. Идалай гъейри, «Кольцо Джанавура» авторди «Эпоха» чапханада «Волшебный мир дагестанской сказки» сериядик кваз акъуднавай вад лагьай ктаб я.

Чна автордиз нубатдин агалкьун рикIин сидкьидай мубаракзава ва финалдани гъалиб хьун вилив хуьзва.

Чи  мухбир