Сулейман-Стальский районда Дагъустандин Гьукуматдин Председателдин заместитель — РД-дин чилиз ва эменнидиз талукь алакъайрин министр Екатерина Толстиковадин регьбервилик кваз совещание хьана. Анал республикадин балансдал алай куьчери малдарвилин, хуьруьн майишатдин чилериз талукь яз арадал атанвай гьалар веревирдна. Идан гьакъиндай “Лезги газетдиз” муниципалитетдин администрациядин пресс-къуллугъдай хабар гана.
Совещанидин кIвалахда Сулейман-Стальский райондин кьил Нариман Абдулмуталибова, райондин депутатрин cобранидин председатель Штибег Мегьамедханова, муниципалитетдин кьилин заместителри ва райадминистрациядин талукь тир къурулушрин пешекарри, хуьрерин поселенийрин администрацийрин кьилери ва жавабдар къуллугърал алай маса ксари иштиракна. Совещанидиз чилиз ва эменнидиз талукь алакъайрин министрдин советник Хабиб Жанаев, РД-дин “Дагтехкадастр” ГБУ-дин директордин сад лагьай заместитель Айдемир Исмаилов, РД-дин Минсельхоздин отделрин начальникар тир Наби Абдулгьамидов ва Мегьамед Мегьамедов, Кьурагь, Мегьарамдхуьруьн, Хив ва Сулейман-Стальский районрин векиларни атанвай.
Екатерина Толстиковади совещанидин иштиракчийрихъ галаз санал арендаторрин вилик акъвазнавай тIал алай месэлаяр веревирдна ва гуьгъуьнлай ам Эминхуьруьн мулкунал алаз хьайи, гила кардик кумачир “Аламишинский” ГУП-дин чилер авай гьалдихъ галаз, чкадал фена, таниш хьана, “Дагтехкадастр” ГБУ-дин инженерри космосдай чилерин шикилар яна.
Гуьруьшдин нетижаяр кьадай чIавуз Е.Толстиковади республикадин хсусиятда авай чилер хуьнин кIвалах гужлу авунин месэлайриз кьетIен фикир гана. “Чил чахъ авай кьилин девлет я, чна ам менфятлудаказ ишлемишун ва чун адав къадирлудаказ эгечIун герек я. РД-дин Кьилин везифаяр вахтуналди тамамарзавай Владимир Васильеван тапшуругъдалди чна республикадин хсусиятда авай чилерин инвентаризация кьиле тухунин кIвалах гъиле кьунва. Сулейман-Стальский район пилотный майдан яз тайинарнава. И кIвалах кьилиз акъудун патал махсус комиссия тешкилнава, “Рекьерин карта” туькIуьрнава. Идалай гуьгъуьниз чун республикадин балансдал алай чилерин участокрин сергьятар тайинарунин мумкинвилериз чкадал фена килигда. Арендаторри, лежбервилинни фермервилин майишатри ва СПОКри республикадин хсусиятда авай чилер ишлемишунин кIвалах къайдадик кутун, хуьруьн майишатдин метягьар гьасилзавайбуруз куьмек гунин серенжемар кьабулун, гьакIни чил ишлемишзавайбурухъ галаз икьрарар дуьздаказ кутIунунин ва чилерин участокрин атIунар тайинарунин кIвалах кьиле тухун лазим я, — къейдна ада.
Ахпа Екатерина Толстикова Вини СтIалрин хуьре алай аямдин лап цIийи жуьрейрин технологияр ишлемишуналди кутазвай интенсивный жуьредин промышленный багъ (“Паласа” ООО) патал чара авунвай мулкунал фена ва кьилиз акъудзавай проектдиз хъсан къимет гана.
Проектдин сергьятра аваз инвестордихъ адетдин жуьредин, гьакIни Европадин алай аямдин стандартрал бинелу интенсивный жуьредин емишрин багълар кутадай фикир ава. ИкI, 500, 200 ва 300 гектардин майданра, талукь тирвал, ичин, пIинийрин ва шуьмягърин интенсивный багълар кутада. И мураддалди саки са агъзур гектардин инвестиционный майдан туькIуьрнава. Багълара ичин “Голден”, “Делишес”, “Грени Смит”, “Гала”, “Ред Чиф”, “Фуджи” сортарин къелемар цада. Инвестордихъ 10 агъзур тонн емишар хуьз жедай чкани галай логистикадин центр арадал гъунин ва пластикдин тара гьазурдай цех ачухунин планарни ава. Инвестицийрин “СтIалрин багълар” проект тамамвилелди 2022-йисуз кьилиз акъуддайвал я.
«Лезги газет»
