Кьиблепатан Дагъустандин жуьреба-жуьре районра, хуьрерани ясин ва дуьа кIелунин са къайда авач. Бязи фекьийри гьисабзавайвал, ясин мейит чуьхвейдалай кьулухъ кIелна кIанзава. Чуьхуьдалди кIелайтIани жеда лугьузвайбурни ава. И кардин патахъай Пайгъамбардин суннада ва Къуръанда вуч лугьузва?
— Инсан кьейидалай кьулухъ сифтени-сифте кьуд кIвалах тамамарун ферз я: мейит чуьхуьн, кафандик кутун, жаназа-капI авун, кучукун. И крар сифте нубатда авуна кIанда, амайбур — ахпа. Ясин мейит чуьхвейдалай кьулухъ кIелун кутугнава.
Пайгъамбардин (къуй Аллагьдин патай салават ва саламар хьурай вичиз) суннадани винидихъ тIвар кьунвай кьуд кIвалах къейднава. Инсан кьейидалай кьулухъ пуд йикъан къене дуьа давамардай ихтияр ава. Анжах им шартI туш. Дуьа пуд юкъуз давамарун тазиятдал яргъарай хквезвайбурни агакьун патал я. Исятда гзаф чкайра кьиле тухузвай яхцIурар, яхцIурни цIикьведар динда авай крар туш.
Къуръанда месэлайрикай, къайдайрикай умумидаказ раханва. Абуруз баянар Пайгъамбардин (къуй Аллагьдин патай салават ва саламар хьурай вичиз) суннади гузва. Ихтилат физвай суалдин патахъай суннади вуч лугьузватIа, винидихъ къейднава.
Жаваб гайиди диндин рекьяй алим Ямин Мегьамедов я.
