«Гьуьрметлу редакция! Яшлу кас яз, захъ гелкъуьнай виликдай пулдин такьатар гузвайди тир. Захъ гелкъвезвай кас кIвалахдал экъечIнавайвиляй пул акъвазарна. Заз и пул масадан кIвачихъ ягъиз кIан хьана. Заз, вучиз ятIани, и пул хгузмач лагьана. Ам вучиз хгучмачтIа?
Абдулгьалим Абдулгьалимов, Къалажухрин хуьр».
Редакциядин патай: Россиядин Яшайишдин фондунин Дагъустанда авай отделенидин пресс-къуллугъдин малуматдин бинедаллаз, чна алай йисан сифтегьан нумрада хабар гайивал, 2025-йисан 1-январдилай 80 йис тамам хьанвай агьалийрихъ ва 1-группадин инвалидрихъ гелкъуьнай гузвай пул гила арза галачиз (проактивно) тайинарзава. Ам пенсиядал алава хъийида ва, гьар йисуз пенсиядихъ галаз сад хьиз, адан кьадарни артух жеда.
Малум тирвал, 80 йис хьанвай агьалидихъ ва 1-группадин инвалиддихъ гелкъуьнай гузвай пулунин кьадарди къенин юкъуз 1200 манат тешкилзава. Виликдай ам, гелкъвезвай кас къалурнавай делилрин бинедаллаз, зегьмет чIугваз жедай бажарагъ авай ва кIвалахдик квачир касди арза гуналди тайинарзавай. Идарадин малуматда мадни гъавурда твазвайвал, гила ам винидихъ гъанвай къайдада тайинар хъийидач, яни и пул тайинарун лазим тир касди арза кхьин, гелкъвезвай кас къалурун ва маса делилар агакьарун герек къвезвач. Амма куьгьне къайдада и пул тайинарнавай ксар патал къалурнавай вахт куьтягь жедалди ам хгуда. 1200 манат пул, винидихъ къалурнавай агьалийри къачузвай пенсиядилай аслу тушиз, яни страховой ва я яшайишдин пенсия къачуниз килиг тавуна, адал алава хъийида. Эгер агьалиди кьве пенсияни къачузватIа, СФР-дин региондин отделениди 1200 манат абурукай садал алава хъувуна гуда. Винидихъни къейднавайвал, алава пулни, пенсия хьиз, гьа са вахтунда ва, процентрал гьалтайла, гьа са кьадарда аваз артухарда.
Гаф кватай чкадал лугьун хьи, 1200 манатдин кьадарда аваз пул арза галачиз, яни цIийи къайдада, инвалид аялдихъ гелкъвезвай касдизни гуда. Алай йисан 1-январдилай и пулни аялдин пенсиядал алава хъийизва.
Къейд. Россиядин Пенсийрин Фондунин Дагъустанда авай отделенидин пешекарри меслят къалурзавайвал, яшайишдин месэлайрай (пенсия, аялдин пособие дуьз тайинарнавани, авачни ва амай вири суалриз талукь яз жавабар) квевай СФР-дин сайтдай, районра кардик квай пенсийрин отделенийрай (абуру ислендилай хемисдалди — пакаман сятдин 9-далай нянин сятдин 6-далди ва жуьмядиз пакаман сятдин 9-далай нянин сятдин 5 тамам жез 15 декьикьа амаз вахтуналди кIвалахзава), гьакIни гьафтедин кIвалахдин винидихъ къалурнавай йикъара ва сятера, Россиядин Яшайишдин фондунин алакъадин сад тир къурулушдикай менфят къачуналди, федеральный центрадин 8-800-100-00-01 нумрадиз зенгна, чириз, лазим меслят къачуз жеда. Зенг пулсузди я.
«Лезги газет»
