Квез и шикилдай аквазвай стхаяр Руслан (2008-йис) ва Шагьмардан (2012-йис) Сайидоврин ери-бине Мегьарамдхуьруьн райондин Чепелрин хуьряй я. Абур Тюменда яшамиш жезва. Тренерар тир Элнур Адиловичан ва Расим Абдуловичан гъилик чпин устадвал хкажзава.
Шадвилелди а кардикай хабар гуз кIанзава хьи, и йикъара Тюмендин областдин кIвенкIвечивал патал кьиле фейи акъажунра жаванри кимоно алаз ва алачиз бягьсер кьиле тухунин жуьрейрай кьве-кьве медаль къазанмишна. Гила абуру Уралдин федеральный округдин кIвенкIвечивал патал Сургутда кьиле фидай акъажунриз гьазурвал аквада.
Са тIимил вахт идалай вилик Шагьмардана ММА-дай, Уралдин федеральный округдин кIвенкIвечивал патал кьиле фейи акъажунра 1-чка кьуналди, Россиядин кIвенкIвечивал патал акъажунриз путёвка къазанмишнавайдини рикIел хкиз кIанзава. Акъажунар Сочида кьиле фида. Къуй чи вири ватанэгьлийрихъ зурба агалкьунар хьурай!
Рагнеда Рамалданова
