Руьгь хкажзавайбур

30-ноябрдиз Каспийскда, энергетикадин колледждин спортзалда, грэпп­лингдай кьиле фейи республикадин­ (JGL — грэпплингдай жаванрин лига) тур­­нирда яшарин ва заланвилин са шумуд категориядай жаванри чпин устадвал ва алакьунар къалурна. Къейд ийиз­ кIанзава хьи, спортдин и жуьредал машгъул жезвайбурун кьадар, санлай­ уьл­кведа хьиз, чи республикадани­ къвердавай артух жезва. Абурун арада чи миллетдин векиларни гзаф хьунал, абуру хъсан нетижаярни къазанмишунал чун мадни шад я.

— Турнир хъсан тешкиллувал аваз кьиле фена. Спортсменрин арада кьиле­ фейи къизгъин бягьсери абурун гьазур­лухвилин патахъай шагьидвалзавай.­ Хъсан нетижаяр турнирда тренер-муал­лим Явер Межидован гъилик чпин устадвал хкажзавай жаванрини къазанмишна. ИкI, 2008-2009-йисара дидедиз хьайи жаванрин арада Имам Залов (60 кг) ва Жабраил Абдулмежидов (50 кг) — 1, 2010-2011-йисара дидедиз хьайи жаванрин арада Амир Къурбанов (53 кг) — 1, Абдуллагь Адилов — 2, Мурад Мегьамедкеримов (61 кг-дилай виниз) 3-чкайриз лайихлу хьана.

РикIел хкин: Явер Межидован ери-бине СтIал Сулейманан райондин КIвар­чагъай я. Ада хайи хуьре юкьван школа, Махачкъалада промышленно-эконо­мический колледж, ДГПУ-дин физичес­кий культурадин ва спортдин факультет акьалтIарна. Боксдай, гъилералди ку­кIу­най, азаддаказ кьуршахар кьунай, самбодай, кикбоксингдай, грепплингдай вердишвилер къачуна. Са шумуд жуьредай­ ада еке агалкьунарни къазанмишна, грэп­плингдай дуьньядин чемпионвилин тIварцIиз лайихлу хьана. Ам жуван ватандихъ рикI кузвай, акьалтзавай несилдин къайгъудар кас я.

***

И мукьвара Хасавюртда азаддаказ кьуршахар кьунай Шамил Умаханован тIварунихъ галай международный XXVI турнир кьиле фена. Нубатдин сефердани ам пагьливанрин къизгъин бягьсералди тафаватлу хьана.

Чи миллетдин векилрикай ана са шумуд спортсменди приздин чкаяр кьуна­. Кьилди къачуртIа, 57 кг-дин заланвал­ авайбурун арада Шамседин Бабаев ва Осман Султанов (Москвадин патай экъечI­­навай), гьакI Рамазан Шабанов (Санкт-Петербургдин патай экъечIнавай) буьруьнждин медалриз лайихлу хьана.

***

Са шумуд югъ идалай вилик Унцукул райондин Шамилкъала посёлокда теннисдай пешекар спортсменрин арада республикадин турнир кьиле фена. Спортдин и жуьредал машгъул жезвайбур патал им устадвал ва алакьунар къалурдай хъсан майдандиз эл­къвена.

Турнирда Кьурагь райондай тир Рамиз Гьашумов буьруьнждин медалдиз лайихлу хьана. Идакай чаз райадминистрациядин пресс-къуллугъди хабар гана.

Рагнеда  Рамалданова