Менфятлу гуьруьш
СтIал Сулейманан райондин администрацияда какахьай бягьсерай (единоборства) машгьур спортсмен Мугьаммед Эминовахъ ва адан тренер, Дагъустандин джиу-джитсудай федерациядин президент Нурдин Эминовахъ галаз гуьруьш кьиле фена. Идакай чаз райадминистрациядин пресс-къуллугъди хабар гана.
Къейд авун лазим я хьи, мугьманри райондин жаванрихъ галазни гуьруьш тешкилнавай. М. Эминован ери-бине Мегьарамдхуьруьн райондин Хуьрелрин хуьряй я. Ам Каспийскда яшамиш жезва. Гуьруьшдал спортсменди вичин спортдин рекьикай суьгьбетна, Кьиблепатан Дагъустанда спорт вилик тухунин гележегдин планар раижна.
Райондин кьил Саид Темирханова спортда къазанмишнавай агалкьунрай, жаванар ватанпересвилин руьгьдаллаз тербияламишуник лайихлу пай кутунай ва жемиятдин активный крарай Мугьаммед Эминоваз ва тренер Нурдин Эминоваз чухсагъул малумарна, пешекарвилин спортда чи ватанэгьлидихъ мадни зурба агалкьунар жедайдахъ инанмишвал къалурна ва рикIел аламукьдай пишкешар гана.
М. Эминова АМС Fight Night Giobal тешкилатди кьиле тухузвай бягьсера алай вахтундани вичин устадвал агалкьунралди къалурзава. Ина ада ярумчух кьезил заланвиляй чемпионвилин тIвар къазанмишна. Ам гьакIни комбат джиу-джитсудай Европадин ва дуьньядин чемпионвилин тIварарин сагьиб я. Спортсмендихъ женгинин ва спортдин самбода къазанмишнавай хъсан нетижаярни ава. Икьван гагьди тухвай бягьсера ада 18 сеферда гъалибвал къазанмишна.
Регина Семедова
_____________________________________
Сардархуьре — акъажунар
Сардархуьруьн спортдин комплексда жаванрин арада азаддаказ кьуршахар кьунай Кьиблепатан Дагъустандин командайрин арада турнир кьиле фена. Районда кардик квай спортдин, туризмдин ва жегьилрин крарай комитетди тешкилай турнирда 170-далай виниз жаван спортсменри заланвилин 13 категориядай гьасиррал чпин устадвал къалурна.
Турнирдин иштиракчияр райондин Кьил Саид Темирханова тебрикна:
«Къенин турнирдин иштиракчийри, викIегьвал къалуруналди, спортда са кам виликди къачуна. Зун инанмиш я хьи, квехъ гележегда гъалибвилер, агалкьунар мадни жеда. Куьн чи спортдин пакадин югъ, гележег я. Райондин кьиле авайбуру спорт вилик тухуниз, куьн чIехи агалкьунрихъ финиз куьмек гуда».
Жаван спортсменрин тIварунихъ чими келимаяр спортдин, туризмдин ва жегьилрин крарай комитетдин директор Чингиз Абдулмежидова, райондин имамрин советдин патав гвай марифатдин отделдин председатель Шамил Рагьманова ва РД-дин физический культурадин лайихлу работник Мингьажудин Къазиевани лагьана.
____________________________
Эминхуьруьн ДЮСШ-да
СтIал Сулейманан районда спортдин жуьреба-жуьре хилерай вердишвилер гузвай 4 ДЮСШ кардик ква. Анра 70-далай виниз тренерри-муаллимри кIвалахзава. Абурун гъилик спортдин 13 жуьредай 1800-дав агакьна гадайрини рушари вердишвилер къачузва ва чпин устадвал хкажзава.
КIвалахда агалкьунар авай спортдин школайрикай яз, чавай азаддаказ кьуршахар кьунай Эминхуьре кардик квай ДЮСШ-дин тIвар кьаз жеда. Ана вердишвилер къачур са шумуд касдикай дуьньядин, Европадин, Россиядин ва Дагъустандин чемпионарни призерар, спортдин мастерар, тIвар-ван авай спортсменар хьанва.
ДЮСШ-диз СССР-дин спортдин мастер, са шумудра Къазахстандин чемпион, и республикадин лайихлу тренер Абдулнасир Мегьамедкеримова регьбервал гузва. Кьасумхуьрел, Зизика, Сардархуьре, Агъа СтIал-Къазмайрал, Вини СтIалдал, ЦIийи Макьарал адан филиалар кардик ква. Санлай къачурла, спортшколада 261 касди кьуршахар кьунай вердишвилер къачузва.
И йикъара Эминхуьре ДЮСШ-дин кIвенкIвечивал патал акъажунарни кьиле фена. Ана 2010-2011-йисара дидедиз хьайи 88 спортсменди иштиракна. Абурун арада акъажунар къизгъиндаказ кьиле фена. Магълуб жез садазни кIанзавачир.
А. Мегьамедкеримова лагьайвал, ДЮСШ-дин жегьил спортсменри чпин алакьунар республикадин, гьакIни Вирироссиядин турниррани къалурзава. Им ана кIвалахзавай тренеррин-муаллимрин гьакъисагъ зегьметдин нетижа я.
Хазран Кьасумов
