«Гимишрин» сагьибар

23-мартдилай 26-мартдалди Орёл ше­гьерда азаддаказ кьуршахар кьунай Россиядин кIвенкIвечивал патал 18 йисал къведалди яшара авай жегьилрин арада акъажунар кьиле фена. Ана уьлкведин 50-далай виниз регионрай тир саки­ 500-дав агакьна спортсменри гьасиррал чпин устадвал ва алакьунар къалурна. Абурун арада Дагъустандин хкянавай командани авай. ИкI, Ислам Рабаданова 48 кг-дал къведалди заланвал авайбурун арада къизилдин, амайбуру гимишдин — 5 ва гьа икьван буьруьнждин медалар къазан­мишна. Гимишдин медалриз лайихлу хьайи­бурун арада чи ватанэгьли Махач Абдуллаевни (55 кг-дал къведалди за­­ланвиляй) ава. Финалда Тувадай тир Чингис Сарыгларахъ галаз бягьс 2:3 гьисабдалди акьалтIна.

РикIел хкин, М. Абдуллаева Махачкъалада, Гьамид Гьамидован тIварунихъ галай Олимпиададин резервдин спорт­школада, тренер Жамал Алиеван гъилик устадвал хкажзава. Алатай йисан эхирра ада Дагъустандин, СКФО-дин кIвен­кIвечивал патал акъажунра гъалиб хьуналди Орёл шегьердиз путевка къазанмишнай.

***

23-мартдиз Моск­вада азаддаказ кьуршахар кьунай 24 йисал къведалди яшара авай жегьилрин арада кьиле фейи Студентрин къугъунра чи ватанэгьли, вичик чIехи умудар кутунвай спортсмен Рагьим Алис­керова 70 кг-дин за­ланвал авайбурун арада гимишдин медаль къазанмишна.

РикIел хкин, Рагьим  Алискерован ери-бине СтIал Сулейманан райондин Герейха­но­ван хуьряй я. Ада тренерар тир Жамал Мирземетован ва Артур Муталибован гъилик вердишвилер къачуна. Алай вахтунда Махачкъалада вичин устадвал хкажзава.

Экуь къаматдиз бахшна

И йикъара Каспийскда, А. Алиеван­ тIварунихъ галай спортдин дараматда­, ВОВ-дин ветеран Асадула Чеэрован экуь къаматдиз бахшна, армиядин къайдада гъилералди кукIу­най Дагъустандин кIвен­кIвечивал патал акъажунар кьиле фена. Ана республикадин шегьеррайни районрай тир 35 командадик кваз 10-17 йисарин яшара авай 275 спортсменди иштиракна. ИкI, Кьурагь райондин администрациядин пресс-къуллугъди хабар гузвайвал, акъажунра иштиракай жаванрикай са шумуда кIвенкIвечи чкаяр кьуна. Кьилди къачуртIа, Нариман Эмирбегов (55 кг) ва Имам Алибегов (36 кг) 1-чкайриз лайихлу хьана. Эрзиман Фетгьуллаева (65 кг) ва Магьмуд Бутаева (33 кг) 3-чкаяр кьуна.

Жаванри тренер Къурбан Герейханован гъилик чпин устадвал хкажзава. И акъажунра иштиракун патал командадиз  Фахрудин Гьамидова лазим тир куьмекар гана. Чпив датIана агакьарзавай куьмекдай тренерди ва спортсменри адаз сагърай лугьузва.

Рагнеда  Рамалданова