Гележегдин дидейринни бубайрин фикир мадни са важиблу месэладал желб ийиз кIанзава, амни аялдин СНИЛС-диз (страховой номер индивидуального лицевого счёта) талукьди я. ИкI, 2025-йисан алатнавай варцара Дагъустандин Яшайишдин фондуни абур, арза галачиз, 9 агъзурдав агакьна агьалийриз ганва.
— Аялдиз и документ медицинадин мажбури страхованидин полис къачун патал, гьакIни аял поликлиникадихъ галкIурдайла, аялрин бахчада учирда акъваздайла ва пособияр тайинардайла, лазим къвезва. ЧIехибурузни — кIвалахал акъвазун ва гележегдин пенсия тайинарун патал, — гъавурда твазва Алжанат Загьидовади.
РикIел хкин: 2020-йисалай СНИЛС аял хьанвай диде-бубадин арза галачиз тайинарзава. ИкI, ЗАГС-дин реестрдай аял хунин гьакъиндай малумат агакьайла, Дагъустандин Яшайишдин фондуни и документдин нумра «Госкъуллугъар» порталда дидедин хсуси кабинетдиз рекье твазва. Гьаниз килигна, ам къачун патал Яшайишдин фондуниз финин лазимвал авач. Амма гележегдин дидедихъ (ва я бубадихъ) тIвар кьунвай порталда тестикьнавай учётдин запись, яни вичин хсуси кабинет хьун лазим тирди рикIел хкиз кIанзава. Дагъустандин Яшайишдин фондунин къуллугъчийри учётдин запись вахтунда, яни аял хадалди, тестикьаруниз эвер гузва. Гьа са вахтунда тестикьнавай учётдин запись аваз, амма дидеди, мисал яз, фамилия дегишнаваз, амма «Госкъуллугъра» и делил цIийи хъувунвачтIа, аялдин СНИЛС-дин нумра хсуси кабинетда акун тавун мумкин я. Ихьтин вахтара СНИЛС Дагъустандин Яшайишдин фондунин муьштерийрихъ галаз кIвалахдай къуллугъра ва я МФЦ-да, яшамиш жезвай чкадилай аслу тушиз, къачуз жеда. Ам къачун патал дидедин ва я бубадин паспортни аялдин шагьадатнама лазим къведа.
Къейд. СНИЛС-дин нумра 11 рекъемдикай ибарат я, ам уьмуьрда са сеферда тайинарзава. Документар квахьайла, гьакIни фамилия, тIвар ва бубадин тIвар дегиш хьайи дуьшуьшрани цIийиди гузвач.
Дагъустандин Яшайишдин фондунин къуллугъчийри агьалийриз дикъетлувал квадар тавуниз эвер гузва.
— СНИЛС-дин делилар садазни лугьумир! ГьикI хьи, лутуйри, чеб Дагъустандин ва я Россиядин Яшайишдин фондунин къуллугъчияр я лугьуналди, лицевой счётдин нумра тIалабун мумкин я. РикIел хуьх! Агьалийривай СНИЛС-дин делилар чи къуллугъчийри садрани зенгна хабар кьазвайди туш, — рикIел хкизва А. Загьидовади.
Р. Рамалданова
