“Дагъустан” РИА-ди, республикадин къанун-къайда хуьдай органра авай чешмедал асаслу яз хабар гузвайвал, 2018-йисан 21-январдиз судди (судья Далгат Гьажиев), официальный тахсиркарвал раиждалди, Махачкъала шегьердин кьил Муса Мусаев 10 юкъуз дустагъдай къарар кьабулна.
Россиядин Силисдин Комитетдин РД-да авай Силисдин Управлениди малумарзавайвал, М.Мусаевак РФ-дин УК-дин 286-статьядин 3-паюнин “в” пунктунин бинедаллаз (чкадин самоуправленидин кьили вичин векилвилерин сергьятдик акат тийизвай, залан нетижайрал гъайи гьерекатар авунай) тахсир кутазва.
Силисдин фикирдалди, алатай йисан мартдин вацра Муса Мусаева Дагъустан Республикадин хсусиятда авай чилин участок къанунсуздаказ маса ганва. Алай вахтунда и месэладиз талукь уголовный кIвалахдай силис тухун давам жезва.
ТАСС-ди Дагъустандин меркездин администрациядин пресс-къуллугъдал асаслу яз хабар гузвайвал, Махачкъаладин мэрдин везифаяр вахтуналди тамамардайди яз виликдай республикадин меркездин кьилин заместитель яз кIвалахай Абусупьян Гьасанов тайинарнава.
А.Гьасанова кьиле тухвай сад лагьай совещанидал вичиз республикадин руководстводи мэриядин вилик эцигнавай месэлаяр гьялунин карда кIвалахдин рекьяй юлдашри куьмек гудайдак умудар кутунвайди къейдна.
«Лезги газет»
