Инсанрин сагъламвал хуьнин рекье намуслудаказ зегьмет чIугвазвай, пешедал рикI алай, вичиз хуьре-кIвале гьуьрмет авай медицинадин хилен са пешекардикай макъала кхьин патал чун СтIал Сулейманан райондин центральный больницадин кьилин духтур Мевлидин Алиомарован патав фена.
– Садан тIвар кьун четин месэла я, – лагьана Мевлидин Алиомарова. – Райондин агьалийриз 88 духтурди, 350-дав агакьна юкьван медработникри къуллугъзава. Абур саки вири гьа куьне лугьузвай хьтин пешекарар я. Нин тIвар кьан?
И арада чун авай кабинетдиз 65-70 йисарин яшара авай итим атана. Ада кьилин духтурдиз офтальмолог Таисия Руслановнадин кIвалахдилай разивилин келимаяр, вичиз гайи куьмекдай чухсагъул лагьана. И дуьшуьш себеб яз чун Т. Гьабибовадикай макъала кхьидай фикирдал атана.
Таисия Руслановна чазни лап хъсандиз таниш я. Адаз чухсагъул лугьузвай чарар пациентрилай «Куьредин хабарар» газетдин редакциядизни са шумудра атайди я.
Къелемни чар гъиле кьурла, чи рикIел персерин духтур, философ Авиценна Ибн Синади лагьай келимаяр хтана: «Духтурдихъ катран вилер, рушан гъилер, гъуьлягъдин акьул, асландин рикI хьана кIанда». Лугьуз жеда хьи, Таисия Руслановна гьа ихьтин духтур я.
Таисия Гьабибова Махачкъалада агъастIалвидин хизанда дидедиз хьана. Гьеле школада кIелзавай йисарилай рикIе духтур хьунин мурад авай лезги руш, юкьван школа акьалтIарна, 1997-йисуз Дагъустандин госмедакадемиядин лечебный факультетдик экечIна. Ана кIелдай йисара Таисия лап хъсан студентрин арада хьана. 2003-йисуз ада ДГМА дерин чирвилер аваз, 2003-2004-йисара офтальмологиядин рекьяй РОБ-да интернатура акьалтIарна.
Жегьил пешекарди вичин зегьметдин рехъ 2007-йисуз Хив райондин ЦРБ-да офтальмолог яз кIвалахунилай башламишна. Ана и везифаяр ада 2011-йисалди намуслудаказ кьилиз акъудна, гьам медработникрин, гьамни агьалийрин патай еке гьуьрмет, кIанивал къазанмишна.
2012-йисалай инихъ Таисия Руслановнади СтIал Сулейманан райондин ЦРБ-да зегьмет чIугвазва.
– Гьа сифте йикъалай Таисия Руслановна вичин хиве авай везифайрив жавабдарвилелди, пациентрив гьуьрметдивди эгечIзава,– лугьузва Мевлидин Алиомарова. – Заз акI я хьи, духтурдин патав атанвай инсандиз ада язавай рапарилай, гузвай дарманрилай гзаф Таисия Руслановнадин хуш рафтарвили, ширин меци, рикIин михьивили куьмекзава. Идалайни гъейри, ада жегьил пешекарризни кIвалахда меслятар къалурзава. Ам чи больницадин дамах я.
Чаз малум хьайивал, Т. Гьабибовади коронавирусдин азар пайда хьайи вахтунда югъ-йиф лугьун тавуна кIвалахна, са шумуд кас ажалдин къармахрай акъудна. Ихьтин зегьметдай духтурдиз Дагъустан Республикадин гьа чIаван Кьил В. Васильева чухсагъулдин чар гана.
Шабагьрикай рахадайла, алава хъийиз жеда хьи, адаз РД-дин РОБ ГБУ-дин кьилин духтур Гъафурова Лариса Гъафуровнадин, профсоюздин рескомдин патай ганвай чухсагъулдин чарар, са шумуд грамота, пишкешар ава.
– Зун шабагьрихъ, тIварарихъ садрани калтугай кас туш, – лугьузва Таисия Руслановнади. – Зи патав больницадиз атана, закай куьмек хьана, кIвализ хъфей гьар са кас зун патал виридалайни чIехи шабагь я.
Гиппократан кьинез вафалу духтур хьиз, Таисия Руслановна ферли 3 веледдин вафалу дидени я. Шадвал кутадай кар: адан чIехи гада Къудрата Саратовдин медицинадин госуниверситетдин стоматологиядин факультетда кIелзава. Амни университетдин чешнелу студентрин арада ава.
«Ашкъидалди кIвалахал физвай ва шадвилелди кIвализ хквезвай инсан бахтлу кас я», – лагьанай туьркерин шаир Надыр Гьикмета. Чи фикирдалди, и келимаяр гьуьрметлу Таисия Руслановна Гьабибовадизни талукь я.
Асият Мирзалиева,
Хазран Кьасумов
