16-май. СтIал Сулейманан районда ХХ асирдин Гомеран 156 йис тамам хьунин ва Шииратдин суварин мярекатар райондин кьил Саид Темирханова, райондин активди, яратмишдай интеллигенциядин ве­килри Кьасумхуьруьн майдандал алай паркуна шаирдин гуьмбетдал ва ЦIийи Мамрачрин хуьруьн кьилихъ галай шаирдин мемориалдин комплексдал тажар ва цуьквер эцигунилай гатIунна.

Гуьгъуьнлай Саид Темирханова­, райондин администрациядин жавабдар къуллугъчийри, мугьманри, Да­гъустандин халкьдин шаирар тир Сажидин Саидгьасановани Майрудин Бабаханова XX асирдин Гомеран КIва­лин-музейдин вилик квай СтIал Сулей­манан гуьмбетдални цуьквер эцигна, рикIел аламукьдай шикилар яна.

КIвалин-музейдин илимдин къул­лугъ­чи Фейзудин Мамедова Шииратдин йикъан иштиракчийриз — мугьманриз музейда экскурсия тешкилна, абур ана авай экспонатрихъ галаз танишарна.

Ахпа суварин асул мярекат кьиле тухузвай Дагъустандин медениятдин лайихлу работник Ярагьмед Ярагьмедова гьуьрметдин сифте гаф Саид Темирхановаз гана. Ада мярекатдин иштиракчияр, республикадин шегьер­райни районрай атанвай мугьманар тебрикна, СтIал Сулейман хайи югъ ва Шииратдин сувар мубаракна, шаз чIехи шаирдин 155 йисан юбилей вини дережада аваз къейд авурди рикIел хкана.

Дагъустандин халкьдин шаир Май­рудин Бабаханов СтIал Су­лей­ма­нан бажарагълувилел, камаллувилел, уьмуьр­дин ва яратмишунрин рекьел гегьеншдиз акъвазна. Ада Гомеракай халкьдин гегьенш къатариз са акьван ашкара тушир делилар,­ мисалар ачухна. Абур мярекатдин иштиракчийриз гзаф итижлу хьана, иллаки — СтIал Сулейманан буба Гьасанбегакай, диде Шейриханакай, Ватандин ЧIехи дяведа телеф хьайи шаирдин рухваяр тир Мегьамедюсуфакайни Мусаибакай авур ихтилатар.

Дагъустандин халкьдин шаир Сажидин Саидгьасанова мярекатдал вичикай шаир хьуниз СтIал Сулейманан шииратди авур чIехи таъсирдикай, Гомеракай вичин буба Саиджамала авур ихтилатрикай, вичин гъиликай хкатай «Зи Сулейман» ктабдикай суьгьбетна ва «Азиз Сулейман» шиир кIелна.

СтIал Сулейманан кьетIен бажарагъдикай чпин фикирар гваз анал «Вахтар ва инсанар» передача тухузвай Владик Батманов, гьикаятчи Наж­мудин Шихнабиев рахана.

Россиядин журналистрин ва лезги писателрин союзрин член Хазран Кьасумова Шииратдин суварин иштиракчияр вичи мукьвара СтIал Сулейман хайи йикъаз талукь яз чапдай акъуднавай «Шаиррин район» ктабдихъ галаз танишарна ва «Шииратдин сувар» шиир кIелна.

Мугьманрин тIварцIихъай жемиятдин «Сила матерей» тешкилатдин регьбер Сабина Мисриханова рахана. Ада СВО-дин зонада авай аскерриз куьмекар гунай, махсус серенжемдин иштиракчийрин ва абурун хизанрин патахъай ийизвай къайгъу­дарвиляй Саид Темирхановаз сагърай лагьана ва тешкилатдин патай адав чухса­гъулдин чар вахкана. И юкъуз Саид Темирханова жемиятдин «Сила мате­рей» тешкилатдин векилрихъ галаз кьилдин гуьруьшни тухвана.

Мярекатдал СтIал Сулейманан штулри — Эминадини Заринади —  лезги ва урус чIаларал чпин чIехи бубадин шиирар кIелна. СтIал Сулейманан хтул Мусаиб Стальскийди гурлу мярекат тешкилунай, ана иштиракунай Саид Темирхановаз, мугьманриз ва иштиракчийриз сагърай лагьана.

Дагъустандин халкьдин шаир СтIал Сулейман хайи йикъан ва Шииратдин суварин мярекат райондин администрациядин медениятдин уп­равленидин векилри гьазурнавай концертдалди акьалтIна.

Хазран Кьасумов