26-октябрдиз мергьяматлувилин «ЛЕКИ» фондунини «Лезги газетдин» редакцияди акьалтзавай несилриз хайи чIал, милли эдебият кIанарунин, художественный эсерар теснифдай бажарагъ авайбур винел акъудунин макьсад авай гегьенш мярекат нубатдин сеферда санал кьиле тухвана. Ихтилат «Лезги шииратдин цIирер» лишандик кваз Мегьарамдхуьруьн медениятдин имаратда мектебрин 8-9 лагьай классра кIелзавай аялрин арада чпи яратмишай шиирар фасагьатдиз кIелунай кьиле тухвай акъажунрикай физва.
Мярекат «ЛЕКИ» фондунин векил Руслан Мегьдиханова ачухна ва конкурсдин шартIарикай куьрелди ихтилатун патал «Лезги газетдин» кьилин редактор Мегьамед Ибрагьимоваз гаф гана.
Яратмишнавай эсерриз, хуралай фасагьатдиз кIелунин тегьердиз, авторвилин алакьунриз, артиствилиз килигна 5 касдикай ибарат жюридин векилри къиметар гана: Лезги писателрин союздин председатель, РД-дин лайихлу юрист, писатель Абил Межидова (жюридин председатель), «Лезги газетдин» кьилин редактор Мегьамед Ибрагьимова, адан заместитель Куругъли Ферзалиева, композитор, журналист Къагьриман Ибрагьимова ва «Вахтар ва инсанар» передача кьиле тухузвай тележурналист Владик Батманова. Иштиракчийриз вини кьил 50 балл къазанмишдай мумкинвал авай.
Санлай къачурла, цIи конкурсда 32 аялди иштиракна. Нубатралди сегьнедал физ, школьникри чпин алакьунар къалурна. Жюридин векилри конкурсдин нетижаяр кьадалди вири иштиракчийриз чай хъвадай, ширинлухар дадмишдай мумкинвал хьана.
Нетижада 1-чкадиз Докъузпара райондин Миграгърин мектебда кIелзавай Генжалиева Фаиза лайихлу хьана (47 балл къазанмишна, адаз диплом ва 15 агъзур манат пул пишкешна), 2-чкадиз Мегьарамдхуьруьн райондин Кучун-Къазмайрин мектебда кIелзавай Ягъибегова Латифа (46 балл къазанмишна, адаз диплом ва 10 агъзур манат пул пишкешна), 3-чкадиз — Мегьарамдхуьруьн 1-нумрадин мектебда кIелзавай Абасова Марина (45 балл къазанмишна, адаз диплом ва 5 агъзур манат пул пишкешна).
1, 2 ва 3-чкаяр кьурбуруз «Лезги газетдин» редакцияди кьиле тухузвай «Хайи чIал хуьн» проектдин сергьятра аваз чапдай акъуднавай «Лезги чIаланни урус чIалан шикилар галай гафарган», «Лезги чIал чирин», «100 тапшуругъ» ктабар пишкешна, Абил Межидова Лезги писателрин союздин патайни грамотаяр гана.
4-далай 14-дал кьван чкаяр кьурбуруз гьардаз 3 агъзур манат пул ва диплом гана. 15-далай 25-дал кьван чкаяр кьурбуруз гьардаз — 2 агъзур манат пулни диплом. Гьа икI, 25 ученик пишкешриз лайихлу хьана. Амайбуруз шииратдин акъажунра иштиракна лагьай сертификатар гана. Школьникрив пишкешарни дипломар жюридин векилри ва Кьиблепатан Дагъустанда «ЛЕКИ» фондунин крар идара ийизвай Равид Азизова вахкана.
Сифтегьан пуд чка кьурбурулай гъейри, инал амай вири аялрин, мектебрин тIварарни кьун кутугнава: Мегьарамдхуьруьн 1-нумрадин мектебда кIелзавай Наврузалиев Имам, Мусаева Арина, СтIал Сулейманан райондин Курхуьруьн 1-нумрадин мектебда кIелзавай Меликова Гуьлмира, Мегьарамдхуьруьн райондин ЦIийи Гъепцегьрин мектебда кIелзавай Нагъметуллаева Фатима, Темирханова Зуьгьре, Аллагьвердиев Рамазан, Докъузпара райондин Къурушрин мектебда кIезавай Гьайбатова Разана, Жалатова Салигьат, Докъузпара райондин Мискискарин мектебда кIелзавай Мустафаева Камила, Мухтарова Фатима, СтIал-Сулейманан райондин Агъа СтIалрин мектебда кIелзавай Гьажиев Ригьадин, Бедевов Ражаб, Кьасумхуьруьн 1-нумрадин мектебда кIелзавай Османова Айша, Докъузпара райондин ЦIийи Къаракуьредин мектебда кIелзавай Залова Амина, Шихмурадова Алина, Мегьарамдхуьруьн райондин Советский хуьруьн мектебда кIелзавай Юлчиева Басира, Алиев Амир-Чабан, Мегьарамдхуьруьн райондин Чепелрин мектебда кIелзавай Хизриева Камила, Кьурагьрин 2-нумрадин мектебда кIелзавай Султанова Аминат, Абдулазизова София, Кьурагь райондин Кьуьчхуьррин мектебда кIелзавай Фейзуллаева Марьям, Мегьарамдхуьруьн райондин Къуюстанрин мектебда кIелзавай Гьуьсейнова Марьям, Хуьрелрин мектебда кIелзавай Мусаева Ирина, Дербент шегьердин 14-нумрадин мектебда кIелзавай Самедова Рейгьан, Каспийск шегьердин 13-нумрадин лицейда кIелзавай Исмаилов Иса, СтIал Сулейманан райондин Зизикрин мектебда кIелзавай Яралиева Самира, Ахцегь райондин Луткунрин хуьруьн мектебда кIелзавай Къадирова Фатима, ЦIийи Усуррин мектебда кIелзавай Айдунбегова Гьежер, Насирова Амина.
ЧIал хуьнин важиблувиликай, жегьилрихъ элкъвена, насигьатдин гафар Мегьарамдхуьруьн райондин образованидин управленидин начальник Улубег Абейдуллаева, Мегьамед Ибрагьимова, Руслан Мегьдиханова, Абил Межидова, Куругъли Ферзалиева, Владик Батманова, муаллим Гуьзел Межидовади ва масабуру лагьана. Къейд авурвал, ихьтин мярекатар аялрин арада мукьвал-мукьвал тухунихъ хъсан метлеб ава.
Конкурсдикай гуьгъуьнлай чна К. Ферзалиеван зенд чирна: «Хъсандиз кьиле фена мярекат. Иштиракчийрин кьадар, вучиз ятIани, за вилив хвейибурулай тIимил хьана. Конкурс жедалди вилик зенгер авурбурун, чаз гьар жуьре суалар гайибурун кьадар гзаф тир. Аялри кIелай шииррин авторар гьакъикъатда вужар ятIа тайинарун са акьван регьят месэла туш. Чна кьатIайвал, гзаф аялриз муаллимри, гьевескар шаирри, гьатта халисан шаиррини куьмекнавай. Бязи эсерар гьам рифмадин, гьам авазлувилин жигьетдай хъсандиз туькIуьрнавайбур тир; абур эдебиятдин такьатар кар чиз ишлемишнавай къелемчийри кхьенвайбур тирди якъин жезвай. И жигьетдай бязи эсеррин лексикадин кьетIенвиерини шагьидвал ийизвай. Гьелбетда, яратмишдай гьевес авай аялриз, жегьилриз куьмек гун адетдин ва лазим кар я. Ина къанунсуз кар авач. Амма аялдин хиве авай тапшуругъ тамамдиз са масада кьилиз акъудун хийир хкат тийидай къайда я. Сифте чпив кхьиз туна, гуьгъуьнлай акур нукьсанар, дуьз текъвезвай чкаяр хълагьна, эсердал мад сеферда кIвалах хъийиз тун менфят гудай рехъ я».
Конкурсда тафаватлу хьайи ученикри яратмишай эсерар «Лезги газетдиз» акъудунин теклиф гана.
Тешкилатчийри хиве кьурвал, къведай йисуз шииратдин мярекат мадни гегьеншдиз, итижлудаказ кьиле тухудай фикир ава.
Руслан Мегьдиханова конкурс кьиле тухун патал куьмек гунай тешкилатчийрин патай Мегьарамдхуьруьн райондин кьилин везифаяр вахтуналди тамамарзавайди тир Нариман Эфендиеваз, образованидин управленидин начальник Улубег Абейдуллаеваз, медениятдин отделдин регьбер Эседуллагь Селимоваз, гьакIни вири иштиракчийриз сагърай лагьана.
С. Салимов
