Алатай гьафтеда Махачкъалада, Дагъустандин госпедуниверситетдин гьаятда,
XX асирдин Гомер СтIал Сулейманан бюст ачухуниз талукьарнавай мярекат кьиле фена
ЧIехи шаирдин гьуьрметдай тешкилнавай межлис ачухдай чIавуз ДГПУ-дин ректор Нариман Асварова алатай йисуз республикада гегьеншдиз СтIал Сулейманан 155 йисан юбилей къейд авурди рикIел хкана ва вуздин мулкарал эцигнавай гуьмбет Дагъустан машгьур авур, хейлин уьлквейрин писателар патал илгьам гузвай маякдиз элкъвей, чIалан акьалтIай камаллу устаддин экуь къаматдиз гьуьрмет авун я.
Мярекатдин сергьятра аваз, СтIал Сулейманакай, адан яратмишунрин алемдикай чпин фикирар РД-дин медениятдин министрдин заместитель Мурад Гьажиева, РД-дин писателрин союздин председатель Марина Агьмедовади ва масабуру лагьана.
ДГПУ-дин Дагъустандин филологиядин факультетдин студентри, Каспийск шегьердин 4-нумрадин юкьван мектебда кIелзавай аялри жуьреба-жуьре чIаларал С. Сулейманан шиирар кIелна, манияр тамамарна.
Агьмед Магьмудов
