«Авачир вичин рикIе чIуру тир ният…»

Ам дагълух Агъа Макьарин хуьре 75 йис идалай вилик дидедиз хьана. Школа­ ада 1969-йисуз дагъвийри аранда кутур ЦIийи Макьарин хуьре акьалтIарна. Армияда къуллугъна, хайи хуьруьз хтана, эвленмиш хьана, хзан кутуна. Советрин девирда вичин агалкьунралди тIвар-ван акъатнавай «Зардиянский» совхозда зегьмет чIугуна: фяле, тракторист, бригадир, инженер ва кьилин инженер яз. КIвалахни ийиз, ада Ростовдин областдин Зерноград шегьерда хуьруьн майишатдин механизациядин институтда кIелна.

1994-йисуз «Лезги газетдин» хсуси корреспондентвиле кIвалахиз эгечIайла, Шагьабудин Шабатован тIвар чи вири  халкьдиз сейли хьана. Къад йисалай виниз девирда газетда кIвалахай ада гьа са вахтунда шаирди хьизни вичин гаф лагьана. Адан поэзиядин ва прозадин са кьадар ктабар акъатна:  «Къуьлуьн кьилер», «Ша хъуьрен», «Илиф Макьаз», «Эй, дуьнья», «Жувакай», «Чи адетар», «Зи фикирар» ва масабур. Эхиримжи ктабдиз, поэзиядин «Аллагьди гайиди» кIватIалдиз, 2020-йисуз дуьнья акунай.

Са шумуд йис вилик Шагьабудин Шабатов залан азарди чи арадай акъудна. Чидайбуруз гилани ам – жумарт рикI авай инсан, инсанвилин чешме — амач лугьур фикирдихъ галаз рази хьун четин акъваззава. Гьакьван ам уьмуьрдал кьару, амайбурузни уьмуьр хъсанариз алахъдай ва алакьдай кас тир. Вич амачтIани, ам къени чахъ галаз рахазма, идалай кьулухъни рахада.  Вичин шиирралди.

Гь. Чандаров