Спортдин кесерлу майданра алакьунар къалурзавай спортсменар районрин администрацийра шад гьалара кьабулун хъсан адетдиз элкъуьнилай чаз разивал къалуриз ва анрин регьберриз сагърай лугьуз кIанзава. И йикъара Кьурагь райондин кьил Замир Азизова гъилералди кукIунай Дагъустандин кIвенкIвечивал патал акъажунра нубатдин сеферда хъсан нетижаяр къазанмишнавай Нариман Эмирбегов ва Имам Алибегов администрацияда шад гьалара кьабулна, районда спорт вилик тухунин, жегьилар спортдал желб авунин месэлаяр веревирдна, спорсменриз чухсагъулдин чарар ва пишкешар гана. Гуьруьшда ДЮСШ-дин директор Руслан Бабаевани иштиракна.
Спортсменри спортдин майданра гъалибвилер къазанмишнавайди сад лагьай сефер туширди къейд авуналди, З. Азизова абуруз вичин ва районэгьлийрин патай агалкьун тебрикна, абурухъ мадни чIехи кукIушар муьтIуьгъардай къуватар, мягькем сагъвал хьун алхишна. Спортсменриз куьмекар гунай, абурун руьгь хкажунай Р. Бабаевани райондин регьбердиз сагърай лагьана.
Рагнеда Рамалданова
