30-июндиз Хасавюрт райондин Къурушдал, Игъиррин магьалда, шадвилин еке мярекат кьиле фена. Акьалтзавай несилдихъ сагъламвал, спортда агалкьунар хьун ва тербия патал дуьз рехъ къалуриз куьмекдай спортдин «Игъир-Арена» комплекс шад гьалара ачухна.
Игъирар Дагъустандин картадал аламачтIани, ам Ахцегь районда еке тарих авай хуьр тир. Гьаниз килигна, ерияр гьамишалугъ рикIера амукьун патал Игъиррин магьалда яшамиш жезвай агъсакъалрин меслятдалди жегьилри ихьтин имарат эцигун кьетIна. Алай вахтунда Игъиррин магьалдин агьалияр, иллаки жегьилар чи зурба уьлкведин вири пипIера яшамиш жезва, гьакъисагъвилелди зегьмет чIугвазва. Мисал яз, тек са Тюмендин областдин Нижневартовск шегьерда саки вишев агакьна жегьилрин кIвалер ава. Абуру нафтIадин мяденра ва жавабдар къуллугърал зегьмет чIугвазва. Акьалтзавай несил чIуру рекье тахьунилай, спортдал машгъул хьуналди, сагълам уьмуьр кечирмишунилай тIимил крар аслу туш. Спортди бедендиз лигимвал, сагъвал гунихъ галаз сад хьиз, уьмуьрдин четин уламрай лайихлудаказ экъечIизни чирзава эхир. Гьаниз килигна, жегьилри вирида спортдин имарат эцигуник чпин лайихлу пай кутунва. Зарафат туш, гьукуматдин патай са куьмекни галачиз, саки 10 миллион манатдив агакьна харжна, чпи гъиле кьур кIвалах ерилудаказ кьилизни акъудна. Баркалла, аферин!
Шад мярекатда патарилай хтанвай гзаф жегьилри, гьакI райондай атанвай векилрини иштиракна. Ам кьиле тухун Къурушрин хуьруьн участокдин больницадин кьилин духтур, Дагъустандин лайихлу духтур, Игъиррин магьалдин агъсакъал Закиров Сабир Закировичан хиве тунвай. «Игъир-Арена» ачухунин ярж тир яру лент атIун магьалдин агъсакъал, устIар Умудов Баласултанал, мектебдин ученикар тир Пашаев Агъадуллагьал ва Эмиров Раилал ихтибарна. Анал рахайбурун арада агъсакъалар тир Эмирхан Эмиров, Сефибег Ханбабаев, хуьруьн администрациядин кьил Рафик Юсупов, Хасавюрт шегьердин администрациядин векил Мегьамед Шагьвеледов, физкультурадин муаллим, агъсакъал Мирзе Мирзоев, Хасавюрт райондин администрациядин кьилин спортдин рекьяй заместитель Мегьамед Исакьов, тренер, СССР-дин спортдин мастер Ислам Гьасанов, Шереф Ханбабаев, муаллим-таржумачи, жегьилрин кьиле акъвазнавай Шагьвелед Закиров, хуьруьн общественник, карчи Ризван Мамедов, и цIарарин автор ва масабур авай. Спортдин уьмуьрда шад вакъиа тебрик авунихъ галаз сад хьиз, абуру зегьмет чIугур ва и кардик къуьн кутур вирибуруз сагърай лагьана, гележегда жегьилрикай спортдин кьакьан кукIушар муьтIуьгъардай кьегьалар хкатуник умуд кутунвайди къейдна. Спортдин комплекс ачухунин мярекат халис сувариз элкъвена.
Игъиррин магьалдин жегьилрин фикирдик ина ял ядай багъ ва спортдал машгъул жедай ксар патал вири къулайвилер арадал гъун ква. Кьилди къачуртIа, сирнавдай гьавиз, спортдин тадаракар авай майдан туькIуьрунин ва маса планар ава. Сад Аллагьди къуй квез рикIе авай мурадар кьилиз акъуддай къуватар гурай, гьуьрметлу Игъиррин магьалдин жегьилар!
Гьажи Къазиев, муаллим
