30-ноябрдиз Мегьарамдхуьруьн райондин Чепелрин хуьре муниципалитетдин ва санлай республикадин экономика патал важиблу мярекат кьиле фена – алай аямдин технологийрал бинеламиш хьана, эцигнавай «Багъ» КФХ-дин емишар хуьдай гьамбархана ишлемишун патал ачухна. И мярекатда онлайн-алакъадин куьмекдалди Дагъустан Республикадин Кьил Сергей Меликовани иштиракна. И чIавуз ам, Хуьруьн майишатдин работникдин югъ къейд авунихъ галаз алакъалу яз, меркездин майдандал ачухнавай мекерада авай.
Инвестор Керимхан Абасова республикадин Кьилиз объект ишлемишиз вахкун патал гьазур тирдакай лагьана ва С.Меликова и кардиз вичин разивал гана. Емишрин гьамбарханадин кIвалах башламишун лишанламишзавай яру лент райондин кьил Фарид Агьмедова ва Керимхан Абасова атIана.
Чна идалай виликни хабар гайивал, еке гьамбархана эцигунин теклиф гайиди «Багъ» КФХ я. Ам, санлай къачурла, 10 агъзур тонн емишар хуьз жедайди хьун лазим я. Дарамат эцигунин кIвалахар кьве паюниз пайнава. ИкI, Мегьарамдхуьруьн райондин информациядин къуллугъди хабар гузвайвал, сад лагьай паюнин кIвалахар кьилиз акъудунин нетижада ина 5 агъзур тонн емишар хуьз жезва. Логистикадин объектдин сад лагьай пай эцигунин кIвалахар эхирдиз мукьва хьайи гатун эхирдилай иниз хсуси багъларай кIватIнавай ичерин бегьер агакьнава.
Гьамбархана къайивал гузвай 20 камерадикай ибарат я. Абурукай гьар сада 250 тонн емишар эцигиз жезва. Ина автоматламишнавай тадаракрин куьмекдалди гьар са сортунин ичер патал лазим тир гьавадин шартIар тешкилзава. Ида кIватIнавай бегьер, хкатунар авачиз, гьатта са йисан вахтунда хуьдай мумкинвал гуда. Идалайни гъейри, «Багъ» КФХ-да са сятда 12 тонн емишар, чпин кьадардиз, рангуниз килигна ва маса уьлчмеяр фикирда кьуна, чара ийидай (сортировкадин) линия кардик кутунва. Карханадихъ 10-далай гзаф тракторар, яд хъчирдай машинар, суьрсет санай масаниз тухудай техника ава.
РикIел хкин, «Багъ» КФХ республикада емишарни майваяр гьасилунал ва гьялунал машгъул са жерге карханаяр арадал гъунин чIехи проектдик акатзава. 2018-йисалай инихъ «Багъ» КФХ-ди фад арадал къведай ва булдаказ бегьер гъидай къайдадин 200 гектардив агакьна майданда ичерин ва чуьхверрин багълар кутунва. Сезондин вахтунда, хабар гузвайвал, майишатдин багълара неинки Мегьарамдхуьруьн райондай тир, гьакIни патарилай къвезвай 200-дав агакьна рабочийри зегьмет чIугвазва. Абур патал ина бедендин михьивал хуьдай, тIуьн недай чкаяр туькIуьрнава, маса къулайвилерни тешкилнава. Гьасилзавай бегьер майишатди алишверишдин сетрин дезгейрилай маса гузва.
Амина Муслимова
