И йикъара Ярагъ-Къазмайрин мектебда Мегьарамдхуьруьн райондин умуми образованидин идарайра лап хъсан агалкьунар хьанвай выпускникар къейд авуниз талукьарнавай шад мярекат кьиле фена.

Йикъан кьилин мярекат сад ва кьвед лагьай дережадин «Чирвилер къачунин рекье кьетIен агалкьунрай» медалар вахкуниз талукьди тир. 2026-йисуз медалриз лайихлу хьайи выпускникрив шабагьар Мегьарамдхуьруьн райондин кьил Нариман Эфендие­ва вахкана. Вири санлай 53 выпускник къейдна: абурукай 28 кас – сад лагьай дережадин (къизилдин), 25 кас кьвед лагьай дережадин ( гимишдин) медалриз лайихлу хьанва. Идахъ галаз сад хьиз аялрив юкьван умуми образование къачунвайвилин яру ва вили рангунин аттестатар вахкана.

Кьилин ва юкьван пешекарвилин об­ра­зование къачунин рекье сифтегьан камар къачуз агакьнавай аяларни кьетIен фикир гуниз лайихлу хьана: райондин ­кьили Мегьарамдхуьруьн райондин шко­ла­яр акьалтIарнавай ва респуб­ликадин ­жуь­реба-жуьре вузра кIелзавай кьве студентдиз чирвилер къачунин рекье къазанмишнавай агалкьунрай Чухсагъул­дин чарар гана.

«Гьуьрметлу директорар, диде-бубаяр ва чи шад мярекатдин мугьманар! Къе чун вири патал кьетӀен югъ я. Къе чна, хъсан адет тирвал, Мегьарамдхуьруьн райондин умуми образованидин идараяр акьалтӀарай лап хъсан выпускникар­ къейдзава... Куьн чи чӀехи уьл­кведин гележегни умуд я. Квез бахтар гурай!» – лагьана Н. Эфендиева.

ЕГЭ-дин имтигьанрай лап хъсан нетижаяр къазанмишай выпускникриз шейх Мугьаммад Ярагъвидин тӀварунихъ галай мергьяматлувилин фондунин патай премияр гана. Выпускникрив пулдин пишкешар райондин кьил Нариман Эфендиева вахкана.

Гаф Мегьарамдхуьруьн М. Гьажиеван тӀварунихъ галай 1-нумрадин СОШ-дин директор Рита Буржумовадиз ва и мектебдин выпускникриз гана. Ада къейд авурвал, и мектебдин выпускникрин арада медалис­тар виридалайни гзаф ава.

Мярекатдал кIватI хьанвай диде-бу­бай­ри ва педагогри райондин руководстводиз образованидин хилез кьетӀен фикир ва бажарагълу жегьилриз куьмек гунай разивилин келимаяр лагьана.

Жасмина Саидова