3-июлдиз Махачкъалада, Дагъустандин писателрин союзда, Дагъустандин халкьдин шаир Пакизат Фатуллаевадин яратмишунриз талукьарнавай мярекат кьиле фена.
Шииратдин межлисдин эвел кьиляй союздин председатель Марина Агьмедовади лезгийрин машгьур шаирдин эсеррикай вичин фикирар лагьана ва Пакизат Фатуллаевади «Дагъустандин дишегьли» журналда кIвалахзавай йисара хайи чIал хуьн ва вилик тухун патал еке зегьмет чIугурди къейдна.
Мярекатдин сергьятра аваз, РД-дин медениятдин министрдин заместитель Мурад Гьажиева шадвилин гьалара Пакизат Фатуллаевадив Дагъустандин халкьдин шаирдин шагьадатнама вахкана, адаз и тIвар гун мубаракна, яратмишунрин рекье мадни чIехи агалкьунар хьун алхишна.
Шииратдин межлисда Дагъустандин жуьреба-жуьре миллетрин шаирри — Залму Батыровади, Бийке Кулунчаковади, Багьаудин Аджиева, Шагьвелед Шагьмарданова, Сувайнат Исрафиловади, Максим Алимова, «Лезги газетдин» мухбир Мурад Саидова ва масабуру иштиракна.
«Дагъустандин дишегьли» журналдин редакциядин патай мярекатдал адан кьилин редактор Хамис Шамилова, лак чIалал акъатзавай выпускдин редактор Ажа Абдурагьманова рахана.
Эхирдай Пакизат Фатуллаевади мярекат тешкилайбуруз сагърай лагьана ва алай вахтунда вичин яратмишунрин кIвалахдикай ихтилатна.
Чи мухбир
