И мукьвара Бахрейндин меркез Манамада 18 йисал къведалди яшара авай жегьилрин арада ММА-дай (чин гъутарив ягъун галачиз) Азиядин къугъунар кьиле фена. Жуьреба-жуьре уьлквейрай тир спортсменри чпин устадвал къалурай и акъажунра чи ватанэгьли, вичин ери-бине Дербент райондин Белиждай тир Абдулаким Бабаева 65 кг-дал къведалди заланвал авайбурун арада 1-чка кьуна.
А. Бабаев Санкт-Петербургда яшамиш жезва, Азиядин къугъунра ада Бахрейндин хкянавай командадик кваз вичин устадвал къалурна, спортда гъалибвилер ада идалай виликни къазанмишнава.
***
Са тIимил йикъар идалай вилик Ямало-Ненецкий автономный округдик (ЯНАО) акатзавай Тарко-Сале шегьерда грекринни римлуйрин жуьреда кьуршахар кьунай ЯНАО-дин кIвенкIвечивал патал ва округдин хкянавай команда арадал гъуниз талукьарнавай акъажунар кьиле фена. Ана 50-далай виниз викIегь пагьливанри гьасиррал чпин устадвал къалурна. Ноябрьск шегьерда яшамиш жезвай Арзу Пирметова 82 кг-дин заланвал авайбурун арада 1-чка кьуна.
Чаз чир хьайивал, А. Пирметован диде-буба Азербайжандин Хачмаз райондай я. Ам Ноябрьск шегьерда дидедиз хьана. Вичини ана хизан кутунва. Уьмуьрдин юлдашдихъ галаз пуд аялдиз тербия гузва. А. Пирметов спортдал аял чIавалай машгъул жезва. Адакай са шумуд сеферда ЯНАО-дин, Тюмендин областдин чемпион, Вирироссиядин ва уьлкведин Кубок патал акъажунрин гъалибчи хьана. 2021-йисуз кьуршахар кьунай (иник азаддаказ ва грекринни римлуйрин жуьреда кьуршахар кьун акатзава) ветеранрин арада кьиле фейи дуьньядин чемпионатда (Греция, Лутраки шегьер) А. Пирметова 78 кг-дал къведалди заланвал авайбурун арада дуьньядин чемпионвилин тIвар къазанмишна. Идалай кьулухъ ада вичи устадвал хкажай «Олимпиец» залда тренер яз зегьмет чIугвазва. Гьа са вахтунда акъажунра вичини къуватар ахтармишзава, аквазвайвал, хъсан нетижаярни къазанмишзава.
***
Каспийскда, Къ. Къурамегьамедован тIварунихъ галай спорткомплексда, 2005-2010-йисара дидедиз хьанвай жаванрин арада республикадин кIвенкIвечивал къазанмишун патал армрестлингдай кьиле фейи акъажунра Дагъларин уьлкведин жуьреба-жуьре шегьеррайни районрай, гьа гьисабдай яз Кьиблепатан Дагъустандайни, спортсменри чпин гъилерин къуват ахтармишна ва гъалибвилер къазанмишна.
Кьилди къачуртIа, Мегьарамдхуьруьн 1-нумрадин ДЮСШ-дин тренер Рустам Салманован регьбервилик кваз устадвал хкажзавай Сулейман Салманов ва Умуд Къадимов 1-чкайриз лайихлу хьана. Ахцегь райондин хкянавай командадик кваз иштиракай Спартак Нурмегьамедова — 2, Эскандер Шагьэмирова ва Риза Муслимова 3-чкаяр кьуна. Жаванри тренерар тир Эльдар Алискендерован ва Эмир Крымован гъилик устадвал хкажзава.
Рагнеда Рамалданова
